2 րոպեի ընթերցում
ԵՐԵՎԱՆ, 30 ՄԱՐՏԻ, ԱՐՄԵՆՊՐԵՍ։ Կառավարությունը ընդունել է կորոնավիրուսի տնտեսական հետևանքների չեզոքացման առաջին միջոցառումը, որի նպատակն է տնտեսավարողների համար ստեղծել ֆինանսական միջոցների ժամանակավոր հասանելիության։
Ինչպես տեղեկացնում է «Արմենպրես»-ը, ՀՀ փոխվարչապետ Մհեր Գրիգորյանը նշեց, որ միջոցառմամբ թիրախավորվում է ծախսի նպատակը, այլ ոչ թե ոլորտը։
«Համարում ենք, որ այս փուլում հնարավոր է լինի իրավիճակ, որ տնտեսավարողը անհրաժեշտություն ունենա միջոցներ ներգրավել վարկերի տեսքով, որպեսզի իրականացնի հումքի, սարքավորումների ներկրման, աշխատավարձերի և հարկերի վճարման հետ կապված ծախսերը… Ըստ էության, ցանկացած բարվոք հարկային և վարկային պատմություն ունեցող տնտեսավարող հնարավորություն կունենա այս միջոցներից օգտվել»,- ասաց Գրիգորյանը։
Նրա խոսքով՝ այս միջոցառումը նախատեսում է երեք գործիք՝ ստացվող նպատակային վարկերի համաֆինանսավորում, վերաֆինանսավորում և տոկոսադրույքի սուբսիդավորում։
«Այսինքն՝ այդ երեք գործիքները լուծում են այն հնարավոր դասական խնդիրները, որոնք այսօր կարող են ի հայտ գալ՝ արտարժույթի ռիսկը, տոկոսադրույքի բարձր լինելը և գրավի կամ պարտավորության կատարման միջոցի նվազ լինելը։ Կարծում ենք, այդ երեք գործիքը խնդիրները կլուծեն»,- եզրափակեց Գրիգորյանը։