Նա բացառիկ անձնավորություն էր. Փաշինյանը ցավակցել է Դևեջյանի մահվան կապակցությամբ

ԵՐԵՎԱՆ, 29 ՄԱՐՏԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանը ցավակցել է Ֆրանսիայում Պատրիկ Դևեջյանի մահվան կապակցությամբ՝ նշելով, որ Դևեջյանը ֆրանս-հայկական բարեկամության կարևորագույն դերակատար էր։

«Արմենպրես»-ի հաղորդմամբ՝ Նիկոլ Փաշինյանը «Թվիթեր»-ի իր միկրոբկլոգում գրել է. «Մեծ ցավով տեղեկացա Պատրիկ Դևեջյանի կորստի մասին։ Նա բացառիկ անձնավորություն էր, համոզմունքների և սկզբունքների քաղաքական գործիչ, հայ դատի հավատարիմ մարտիկ, ֆրանս-հայկական բարեկամության կարևորագույն դերակատար»։

«Ցավակցություններս նրա կնոջը, որդիներին և ընկերներին։ Հայաստանը և բոլոր հայերը կիսում են այս մեծ կորստի ցավը Ֆրանսիայի և Ֆրանսիացիների հետ»,- հավելել է Փաշինյանը։

C'est avec un immense chagrin que j’ai appris la disparition de Patrick Devedjian. Il était une personnalité exceptionnelle, un homme politique de convictions et de principes, combattant fidèle de la cause arménienne, acteur essentiel de l'amitié franco-arménienne.

— Nikol Pashinyan (@NikolPashinyan) March 29, 2020

Օ-դը-Սեն դեպարտամենտի նախագահ 75-ամյա Դևեջյանն օրեր առաջ հայտնել էր, որ հիվանդությունն իրեն էլ է խոցել, բայց բժիշկների շնորհիվ ապաքինվում է։ Ցավոք, բուժանձնակազմին չի հաջողվել փրկել ֆրանսահայ ականավոր գործչի կյանքը։

Պատրիկ Դևեջյանը ծնվել էր 1944թ. օգոստոսի 26-ին։ Նա ակտիվ ներգրավված էր Ֆրանսիայի քաղաքական կյանքում։ 2002 թվականին նշանակվել է տեղական ինքնակառավարման հարցերի նախարար, 2004 թվականին Ֆրանսիայի արդյունաբերության նախարարի պորտֆելն է զբաղեցրել։