Հեռավար ուսուցման գործընթացին ներգրավվել է մարզերի աշակերտների ավելի քան 80 տոկոսը
1 րոպեի ընթերցում
![Հեռավար ուսուցման գործընթացին ներգրավվել է մարզերի աշակերտների ավելի քան 80 տոկոսը](http://armenpress.am/resized/480/static/news/b/2020/03/1010015.jpg)
ԵՐԵՎԱՆ, 25 ՄԱՐՏԻ, ԱՐՄԵՆՊՐԵՍ: ՀՀ կրթության, գիտության, մշակույթի և սպորտի նախարարությունն ամփոփել է հեռավար ուսուցման գործընթացի առաջին շաբաթը: «Արմենպրես»-ի փոխանցմամբ՝ այս մասին Ազգային ժողովում կառավարության հետ հարցուպատասխանի ընթացքում ասաց ՀՀ կրթության, գիտության, մշակույթի և սպորտի նախարար Արայիկ Հարությունյանը՝ պատասխանելով «Լուսավոր Հայաստան» խմբակցության անդամ Կարեն Սիմոնյանի հարցին:
«Մենք այսօր ամփոփում ենք հեռավար դասապրոցեսի իրականացման առաջին շաբաթը: Մարզերից ստացված տեղեկությունների համաձայն՝ աշակերտների 80 և ավելի տոկոսի ներգրավվածություն ունենք այս գործընթացում, ինչը հավասար է դպրոցներում հունվար-փետրվար ամիսների միջին հաճախումներին: Մենք մեծամասամբ կարողացել ենք ներգրավվածությունն ապահովել»,- ասաց Հարությունյանը:
Նախարարը նշեց, որ դասապրոցեսի կազմակերպման հետ որոշ տեխնիկական խնդիրներ են առաջացել, որոնք փորձում են լուծել: Անդրադառնալով դասապրոցեսը երկարաձգելու վերաբերյալ քննարկումներին՝ Հարությունյանը նշեց, որ դրա անհրաժեշտությունը կլինի, բայց շատ փոքր չափով: