1 րոպեի ընթերցում
ԵՐԵՎԱՆ, 16 ՄԱՐՏԻ, ԱՐՄԵՆՊՐԵՍ: ՀՀ կառավարության կողմից խրախուսական պարգևի կարժանանա Հայաստանում կորոնավիրուսով վարակված առաջին անձը: «Արմենպրես»-ի փոխանցմամբ՝ այս մասին «Ֆեյսբուք»-ի իր էջի ուղիղ եթերում հայտնեց ՀՀ վարչապետ Նիկոլ Փաշինյանը:
«Որոշում եմ կայացրել, որ խրախուսական որևէ պատվոգրով պետք է պարգևատրել մեր առաջին ախտորոշված պացիենտին, որն իր բարձր գիտակցությամբ շատ լուրջ ծառայություն մատուցեց և օգնեց, որ վարակը շատ չտարածվի»,- ասաց Փաշինյանը:
Վարչապետը շնորհակալություն հայտնեց բուժաշխատողներին, առողջապահության նախարարությանը, կորոնավիրուսի կանխարգելման աշխատանքային խմբին, հանձնաժողովին, որոնք այս օրերին օր ու գիշեր աշխատել են:
Հայաստանում կորոնավիրուսի հաստատված դեպքերի թիվը հասել է 30-ի: Հայաստանում կորոնավիրուսի հաստատված առաջին դեպքը գրանցվել էր մարտի 1-ին: Քաղաքացին Հայաստան էր եկել Իրանից: Նա արդեն ապաքինվել է և դուրս է գրվել:
ՀՀ կառավարությունը մարտի 16-ին կքննարկի Հայաստանում արտակարգ դրություն հայտարարելու հարցը: