3 րոպեի ընթերցում
ԵՐԵՎԱՆ, 19 ՓԵՏՐՎԱՐԻ, ԱՐՄԵՆՊՐԵՍ: Խնկո Ապոր անվան ազգային մանկական գրադարանի Մանկապատանեկան գրքի երևանյան 16-րդ տոնավաճառ-ցուցահանդեսին հետաքրքիր գրական հավաքածուներով մասնակցում են մի շարք հրատարակչություններ և գրատներ, որոնք գրքերը վաճառում են զեղչված գներով: Տոնավաճառի շրջանակում նախատեսվում են գրքերի շնորհանդեսներ, կինոդիտումներ և այլ միջոցառումներ:
«Արմենպրես»-ի հաղորդմամբ`տոնավաճառ-ցուցահանդեսը բացվեց Հովհաննես Թումանյանի ծննդյան օրը` փետրվարի 19-ին:
«Ամեն տարի փորձում ենք ավելի գրավիչ նախաձեռնություններով հանդես գալ: Այս անգամ միջոցառման շրջանակում 2019 թվականին Մանկագիրների և նկարազարդողների մրցույթի դեռևս չհանրայնացված մրցանակակիրների աշխատանքների ինտերակտիվ քննարկումներ ենք կազմակերպել գրադարանի տարբեր սրահներում, կազմակերպում ենք նաև «Նվեր զինվորին» ակցիան, տարվա հոբելյարներին ենք հիշելու կինոդիտումների, քննարկումների միջոցով»,-ասաց տոնավաճառի համակարգող Գայանե Կարապետյանը:
Նա հավելեց, որ նախատեսվում են նաև մուլտֆիլմերի դիտումներ, գրքերի շնորհանդեսներ, հեքիաթների ընթերցումներ և այլն:
Հայաստանի գրողների միության նախագահ Էդվարդ Միլիտոնյանն էլ հիշեցրեց, որ Թումանյանի ծննդյան օրը նշվում է նաև Գիրք նվիրելու օրը: «Տոնը տարածում է ստացել նաև արտերկրում`Վրաստանում, Լիբանանում: Այդ առիթով միության անդամները հանդիպում են դպրոցների աշակերտների հետ, գրքեր նվիրում նրանց և անցորդներին: Այսպես ցանկանում ենք գիրքը դեպի մարդը տանել և հիշեցնել, որ մարդը նույնպես պետք է մոտենա գրքին: Կարծում եմ` գիրքը պետք է ամենալավ նվերը դառնա յուրաքանչյուր լավ առիթի դեպքում»,- շեշտեց նա:
Մանկապատանեկան գրքի երևանյան 16-րդ տոնավաճառ-ցուցահանդեսին ներկա էին բազմաթիվ փոքրիկներ, որոնց ձեռքին Հովհաննես Թումանյանի գրքերն էին: Իննամյա Դավիթ Հովհաննիսյանն ասաց, որ շատ է սիրում «Անխելք մարդը», «Պոչատ աղվեսը», «Խոսող ձուկը» և այլ հեքիաթներ: Դավիթը նշեց, որ դիտել է Թումանյանի հեքիաթների հիման վրա նկարահանված մուլտֆիլմերը, որոնք նույնպես շատ հավանել է:
«Անահիտ», «Պոչատ աղվեսը» և «Ոսկե ձկնիկը» ստեղծագործությունների երկրպագու Խորեն Սարգսյանն էլ ասաց, որ գրքեր շատ է սիրում և անպայման նոր գիրք է գնելու, բայց չի պատրաստվում նվիրել փոքր քրոջը, քանի որ վերջինս կպատռի այն: «Նա երեք տարեկան է ու կարող է փչացնել գիրքը»,-խոստովանեց Խորենը:
Տոնավաճառ-ցուցահանդեսին մասնակցում են «Էդիթ Պրինտ», «Զանգակ», «Արևիկ», «Դարակ», «Ջի Էս Էմ» և մի շարք այլ հրատարակչություններ: