368.52
Սիրիայի պատգամավորները բուռն ու հոտնկայս ծափողջյուններով են ընդունել Հայոց ցեղասպանության ճանաչումը
2 րոպեի ընթերցում
ԵՐԵՎԱՆ, 13 ՓԵՏՐՎԱՐԻ, ԱՐՄԵՆՊՐԵՍ:Սիրիայի խորհրդարանը, որը փետրվարի 13-ին միաձայն ընդունեց Հայոց ցեղասպանությունը ճանաչող և դատապարտող բանաձևը, կոչ է արել աշխարհի խորհրդարաններին և միջազգային հանրությանը հետևել իր օրինակին:
«Արմենպրես»-ի հաղորդմամբ` Սիրիայի խորհրդարանի հայ պատգամավոր, բանաձևի ընդունման նախաձեռնող Սիրիա-Հայաստան խորհրդարանական բարեկամական հանձնախմբի անդամ Նորա Արիսյանը, ներկայացնելով բանաձևի մանրամասները, նշել է, որ փաստաթղթում հստակ օգտագործված է «Հայոց ցեղասպանություն» արտահայտությունը և այն դատապարտելու, ճանաչելու հանգամանքը:
«Խորհրդարանը դատապարտում է ցեղասպանության ուրացման և պատմության նենգափոխման յուրաքանչյուր փորձ և հաստատում, որ Հայոց ցեղասպանությունը մարդկության դեմ գործադրված ամենից դաժան ոճիրն է։ Խորհրդարանը կիսում է բարեկամ հայ ժողովրդի ցավը»,-նշված է բանաձևում:
Նորա Արիսյանը շեշտել է, որ խորհրդարանի պատգամավորները բուռն ու հոտնկայս ծափողջյուններով են ողջունել Հայոց ցեղասպանության ճանաչումը: Արիսյանը շնորհակալություն է հայտնել խորհրդարանի գործընկերներին, որոնք չորս տարվա խորհրդարանական աշխատանքի ընթացքում զորակցություն և աջակցություն են ցուցաբերել Հայ դատի հարցերին ու հատկապես Հայոց ցեղասպանության բանաձևին:
«Ցանկանում եմ մեծ շնորհակալություն ու երախտագիտություն հայտնել Սիրիայի Հանրապետության նախագահ Բաշար ալ-Ասադին, ցուցաբերած նախ անսահման վստահության, ինչպես նաև իր զորավոր հավատի՝ մարդկային իրավունքի արժեքների, մարդկային արդարության, բարության նկատմամբ ու մանավանդ հայ ժողովրդի ոտնահարված իրավունքները պաշտպանելու համար»,-նշել է հայ պատգամավորը:
Բաժանորդագրվեք մեր ալիքին Telegram-ում