Նախարարը նախադպրոցական կրթության օրենքի նախագիծը նմանեցնում է սահմանադրական փոփոխություններին
2 րոպեի ընթերցում
![Նախարարը նախադպրոցական կրթության օրենքի նախագիծը նմանեցնում է սահմանադրական փոփոխություններին](http://armenpress.am/resized/480/static/news/b/2020/02/1004288.jpg)
ԵՐԵՎԱՆ, 10 ՓԵՏՐՎԱՐԻ, ԱՐՄԵՆՊՐԵՍ: ՀՀ կրթության, գիտության, մշակույթի և սպորտի նախարար Արայիկ Հարությունյանը «Նախադպրոցական կրթության մասին» օրենքում փոփոխությունների նախագիծը նմանեցնում է սահմանադրական փոփոխություններին: «Արմենպրես»-ի փոխանցմամբ՝ այս մասին նախարարն ասաց փետրվարի 10-ին ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախաձեռնությամբ կազմակերպված «Նախադպրոցական կրթության ոլորտի օրենսդրական բարեփոխումներն ու հիմնախնդիրները Հայաստանում» թեմայով ընդլայնված աշխատանքային քննարկման ժամանակ:
«Այս օրենքի նախագիծը սահմանադրական փոփոխությունների պես մի բան է, որովհետև հենց այն սերունդը, որի համար նախատեսված է այս օրենքի նախագիծը, ամբողջությամբ դրական առումով վերափոխելու է մեր պետությունը, որովհետև ամենասկզբի լավ հիմքի վրա ենք դնում նրա կրթական գործընթացը»,- ասաց Հարությունյանը:
Օրենքի ընդունմամբ հնարավոր է դառնում երկրում կրթության կազմակերպման և իրականացման մեխանիզմների արդիականացումը, որոնք համահունչ են ժամանակակից մարտահրավերների կարգավորմանն ուղղված միջոցառումներին:
«Նախադպրոցական կրթության մասին» Հայաստանի Հանրապետության օրենքում փոփոխություն կատարելու մասին օրենքի նախագիծը հունվարի 24-ի Ազգային ժողովի նիստում առաջին ընթերցմամբ ընդունվել է միաձայն՝ 110 կողմ ձայնով: