Հայաստանը և Ռուսաստանը առանցքային հարցերում նույն առաջնագծում են կանգնած. ՌԴ դեսպան
2 րոպեի ընթերցում
ԵՐԵՎԱՆ, 10 ՓԵՏՐՎԱՐԻ, ԱՐՄԵՆՊՐԵՍ: Ռուս դիվանագետների մասնագիտական օրվա կապակցությամբ Հայաստանում Ռուսաստանի Դաշնության դեսպանատան աշխատակիցները դեսպան Սերգեյ Կոպիրկինի գլխավորությամբ փետրվարի 10-ին ծաղիկներ խոնարհեցին և ծաղկեպսակ դրեցին հայ ժողովրդի մեծ բարեկամ, ռուս նշանավոր բանաստեղծ և դիվանագետ Ալեքսանդր Գրիբոյեդովի արձանին:
Ինչպես տեղեկացնում է «Արմենպրես»-ը, խոսելով հայ-ռուսական հարաբերությունների ներկայիս վիճակի մասին, լրագրողների հետ զրույցում դեսպան Սերգեյ Կոպիրկինն ընգծեց, որ հայ-ռուսական հարաբերությունները գտնվում են բարձ մակարդակի վրա:
«Այդ կարգավիճակը բավականին հայտնի է` մենք դաշնակիցներ ենք, ռազմավարական գործընկերներ, իսկ հայ և ռուս ժողովուրդները՝ եղբայրներ: Այդ ամենն արտացոլվում է նաև մեր դիվանագիտական հարաբերություններում, որոնք կրում են ինտենսիվ բնույթ: Իսկապես, մեր դիվանագիտական ծառայությունների հարաբերությունները սերտ և անմիջական են»,- ասաց Կոպիրկինը:
Դեսպանատան աշխատակիցները և դեսպանը եղել են նաև մայրաքաղաքի կենտրոնական գերեզմանատանը և ծաղիկներ խոնարհել անվանի հայ դիվանագետների շիրիմներին, ովքեր մեծ ավանդ են ունեցել դիվանագիտության ասպարեզում:
«Այսպիսի հարուստ պատմությամբ և ավանդույթներով, կարծում եմ, լավ իմաստով դատապարտված ենք սերտ համագործակցության՝ մանավանդ, որ մեզ մոտ շատ են ընդհանուր խնդիրները և շահերը: Այս բարդ աշխարհում հայ ու ռուս դիվանագետներն
առանցքային հարցերում նույն առաջնագծում են կանգնած: Դա շատ կարևոր է, և Ռուսաստանը դա գնահատում է»,- եզրափակեց Կոպիրկինը:
