Գեղարքունիքի մարզպետի աշխատակազմին է ներկայացվել ՀՀ ՇՄՆ էկոպարեկային ծառայության Կոտայքի և Գեղարքունիքի մարզային վարչության նորանշանակ պետը

Գեղարքունիքի մարզպետ Կարեն Սարգսյանն ընդունել է  ՀՀ ՇՄՆ էկոպարեկային ծառայության պետ Վլադիմիր Կիրակոսյանին և էկոպարեկային ծառայության պետի տեղակալ Մուրադ Նուրիջանյանին։ 

«Արմենպրես»-ի տեղեկացմամբ՝ հանդիպման ընթացքում Վլադիմիր Կիրակոսյանը Գեղարքունիքի մարզպետի աշխատակազմին է  ներկայացրել  ՀՀ ՇՄՆ Կոտայքի և Գեղարքունիքի մարզային վարչության նորանշանակ պետ Հովիկ Սաֆարյանին։ 

Հանդիպմանը մասնակցել են  նաև Գեղարքունիքի մարզպետի տեղակալ Վահան Զարոյանը և Գեղարքունիքի մարզպետի աշխատակազմի ՏԻ և ՀԳՄ հարցերի վարչության պետ Վանիկ Հարությունյանը։ 

Վլադիմիր Կիրակոսյանը, մարզպետին ներկայացնելով էկոպարեկային ծառայության լիազորություններն ու գործառույթները, միաժամանակ շեշտել է, որ Կոտայքի և Գեղարքունիքի մարզերում, ներառյալ Սևանա լիճը, էկոպարեկների գործունեությունը տարածվում է շուրջ 700 հազար հեկտարի վրա, որի հիմնական նպատակը բավականին հարուստ կենսաբազմազանության պահպանության ու վերարտադրության ապահովումն է։ 

ՀՀ ՇՄՆ էկոպարեկային ծառայության պետը հույս է հայտնել, որ իրենց գործունեության արդյունավետությունը միաժամանակ պայմանավորված կլինի Գեղարքունիքի մարզպետի աշխատակազմի հետ համագործակցությամբ։ 

Կարեն Սարգսյանը, ողջունելով հյուրերերին ու նոր պաշտոնում նշանակվելու կապակցությամբ շնորհավորելով Հովիկ Սաֆարյանին, հավաստիացրել է, որ Գեղարքունիքի մարզպետի աշխատակազմը անելու է հնարավորը՝ մշտական համագործակցություն ապահովելու համար։ 

«Մենք լավ գիտենք, թե ինչ հարուստ կենսաբազմազանություն ունի Գեղարքունիքի մարզը, կենդանական ու բուսական աշխարհի ինչպիսի բացառիկ տեսակներ, որոնց պահպանության ու վերարտադրության ապահովումը բոլորիս գերխնդիրն է ու պարտականությունը։ Համագործակցության համար մենք բաց ենք մշտապես ու շուրջօրյա»,-հանդիպումն ամփոփել է  մարզպետ Կարեն Սարգսյանը։ 

Խոսրով Խլղաթյան