Արևիկ Անափիոսյանն այլևս ԿԳՄՍ փոխնախարար չի աշխատի, նա սովորելու է մեկնում արտերկիր

ԵՐԵՎԱՆ, 6 ՓԵՏՐՎԱՐԻ, ԱՐՄԵՆՊՐԵՍ:Հայաստանի Հանրապետության կրթության, գիտության, մշակույթի և սպորտի նախարարի տեղակալ Արևիկ Անափիոսյանը աշխատանքից ազատման դիմում է ներկայացրել` պարզաբանելով, որ թողնում է պաշտոնը արտերկրում սովորելու համար:

«Արմենպրես»-ի հաղորդմամբ` այս մասին Անափիոսյանը գրառում է կատարել «Ֆեյսբուք»-ի իր էջում:

«Սիրելի ընկերներ, գործընկերներ, ծանոթներ, անծանոթներ, բարի կամեցողներ, համաքաղաքացիներ, ես ընդունվել եմ Հարվարդի համալսարանի բիզնես դպրոց և արդեն հունվարի 13-ից (առաջին մոդուլը` հեռակա) ուսանում եմ Գործադիր կառավարման կրթական ծրագրով: Ծրագրի շրջանակում սովորում եմ ֆինանսներ, ռազմավարական պլանավորում և կառավարում, միջազգային համագործակցություն, առաջնորդություն ու էլի նման հետաքրքիր ու կարևոր թեմաներ: Շատ եմ կարևորում մասնագիտական շարունակական զարգացումը և ուրախ եմ, որ մի քանի բարին կամեցող մարդկանց աջակցությամբ ունեմ այս դպրոցում սովորելու հնարավորություն»,-նշել է նա:

Անդրադառնալով աշխատանքին` Անափիոսյանն ասել է, որ դուրս գալով ներկայիս աշխատանքից, ցանկանում է հույս հայտնել, որ մեր պետության համար կարևոր այն բոլոր նախաձեռնություններն ու ծրագրերը՝ մասնավորապես, հանրակրթության ոլորտում չափորոշիչների վերանայում, առարկայական ծրագրերի մշակում, գնահատման համակարգի մշակում ու ներդնում, ուսուցիչների որակավորման շրջանակ և ստանդարտներ, ուսուցիչների մասնագիտական զարգացում և այլն, կշարունակեն իրականացվել:

«Միջազգային համագործակցության մասով` այս ընթացքում հասկացա, որ եթե երկրի ներկայացուցիչը խելացի է և կարողանում է անկեղծ խոսել խնդիրներից ու համագործակցության ծրագրեր ներկայացնել, ապա գործընկերների պակաս չի լինի. հույս ունեմ՝ այստեղ էլ նույն ռիթմով կշարունակվի: Քանի որ սա հաշվետվության հայտարարություն չի, այլ սովորելուս մասին ընդգրկուն հրապարակում, ցանկանում եմ սրտանց շնորհակալություն հայտնել իմ բոլոր գործընկերներին և խնդրել, որ շարունակեն իրենց աջակցությունը կառավարության նախաձեռնություններին, իսկ թե կան ընկերներ կամ գործընկերներ, ում պատահաբար վրդովեցրել եմ, ապա այսօր սիրով հրավիրում եմ «Բարով մնաք» երեկոյին:

Տեղի համար կգրեմ ԱՆ»,-շեշտել է Արևիկ Անափիոսյանը:

Արևիկ Անափիոսյանը ՀՀ կրթության, գիտության, մշակույթի և սպորտի նախարարի տեղակալ էր նշանակվել 2019 թվականի հունիսի 4-ին: