Կոտայքի մարզի Քասախ գյուղում ավտոմեքենա է այրվել

ԵՐԵՎԱՆ, 12 ՀՈՒՆՎԱՐԻ, ԱՐՄԵՆՊՐԵՍ: ՀՀ արտակարգ իրավիճակների նախարարության «911» ծառայությունը hունվարի 12-ին, ժամը 00:28-ին ահազանգ է ստացել, որ Կոտայքի մարզի Քասախ գյուղի Վ. Սարգսյան փողոցում այրվում է ավտոմեքենա. մոտակայքում կա գազատար խողովակ:

Դեպքի վայր են մեկնել ԱԻՆ փրկարար ծառայության Երևան քաղաքի փրկարարական վարչության հրշեջ-փրկարարական ջոկատից մեկ և հատուկ հրշեջ ջոկատից ևս մեկ մարտական հաշվարկ:

Պարզվել է, որ հրդեհը բռնկվել է Քասախ գյուղի թիվ 1 դպրոցի մոտակայքում. գազատար խողովակը չի վնասվել:

Հրդեհը մեկուսացվել է ժամը 00:41-ին, մարվել՝ 00:48-ին: Տուժածներ չկան:

Ինչպես «Արմենպրես»-ին տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից, «ՎԱԶ-2107» մակնիշի ավտոմեքենան (վարորդի տվյալները չի հաջողվել պարզել) ամբողջությամբ այրվել է։