2 րոպեի ընթերցում
ԵՐԵՎԱՆ, 30 ԴԵԿՏԵՄԲԵՐԻ, ԱՐՄԵՆՊՐԵՍ։ Երևանում դեկտեմբերի 30-ին թիվ 42 երթուղու միկրոավտոբուսի վթարի հետևանքով վարորդը մահացել է, 6 ուղևոր՝ վիրավորվել: Այս մասին «Արմենպրես»-ին տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից:
«Դեկտեմբերի 30-ին, ժամը 14:46-ին «911» ծառայություն ահազանգ է ստացվել, որ Երևանի «Աստղիկ» ԲԿ-ի մոտակայքում տեղի է ունեցել ՃՏՊ՝ ավտոբուսը բախվել է սյանը. կան տուժածներ և զոհ:
Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից երկու մարտական հաշվարկ:
Պարզվել է, որ Կուրղինյան փողոցում թիվ 42 երթուղին սպասարկող «ԳԱԶել» մակնիշի միկրոավտոբուսը (վարորդ՝ Պողոս Դ., ծնված 1963 թ.) դուրս է եկել ճանապարհի երթևեկելի հատվածից և բախվել էլեկտրական սյանը:
Մինչ փրկարարների՝ կանչի վայր հասնելը վարորդը և ուղևորները՝ Բելլա Բ.-ն (ծնված 1981 թ.), Զոյա Մ.-ն (ծնված 1973 թ.), Ասյա Պ.-ն (ծնված 1953 թ.), Ռոմիկ Վ.-ն (ծնված 1960 թ.), Զեմֆիրա Բ.-ն (ծնված 1948 թ.) և Գագիկ Հ.-ն (ծնված 1950 թ.) տեղափոխվել են «Աստղիկ» ԲԿ, որտեղ վարորդը մահացել է, իսկ ուղևորների առողջական վիճակը բժիշկները գնահատել են բավարար»,- նշված է հաղորդագրության մեջ: