ՀՅԴ-ն Արայիկ Հարությունյանին անվստահություն հայտնելու հարցով դիմել է ԼՀԿ խմբակցությանը

ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ: Հայ հեղափոխական դաշնակցությունը Կրթության, գիտության, մշակույթի և սպորտի նախարար Արայիկ Հարությունյանին անվստահություն հայտնելու հարցով դիմել է Ազգային ժողովի «Լուսավոր Հայաստան» խմբակցությանը:

«Արմենպրես»-ի փոխանցմամբ՝ այս մասին նոյեմբերի 26-ին ՀՀ Ազգային ժողովում լրագրողների հետ զրույցում ասաց խմբակցության ղեկավար Էդմոն Մարուքյանը:

«Ստացել ենք նամակ, պատասխանել ենք: Խորհրդրարանի խմբակցությունները չեն կարող մեկ նստաշրջանի ընթացքում մի քանի նախարարի անվստահություն հայտնել: Մենք Ֆինանսների նախարարին անվստահություն արդեն հայտնել էինք, մերժվել էր, այս եկող նստաշրջանում այլ նախարարի վերաբերյալ արդեն գործընթաց կար սկսված, և մենք չենք կարող հիմա էլ արդեն այլ նախարարի վերաբերյալ գործընթաց սկսել»,- ասաց Մարուքյանը:

Նոյեմբերի 7-ին ԿԳՄՍ նախարարության դիմաց մեկնարկել է Արայիկ Հարությունյանի հրաժարականի պահանջով որոշ բուհերի ուսանողների և ՀՅԴ երիտասարդական թևի ներկայացուցիչների նստացույցը: