Ժամանակը Երևանում՝ 11:07:36,   21 Նոյեմբեր

Մալթացի ժամանակակից կոմպոզիտոր Ալեքսեյ Շորի գործերը հնչեցին Արամ Խաչատրյան համերգասրահում

Մալթացի ժամանակակից կոմպոզիտոր Ալեքսեյ Շորի գործերը հնչեցին Արամ 
Խաչատրյան համերգասրահում

ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Կոմպոզիտոր Ալեքսեյ Շորը, որը նախկինում հյուրընկալվել է Հայաստանում, մասնակցեց իրեն նվիրված համերգային երեկոյին:

«Արմենպրես»-ի հաղորդմամբ՝ «Ժամանակակից դասականներ» կոմպոզիտորական փառատոնի  շրջանակում կազմակերպված երեկոն անցկացվեց նոյեմբերի 5-ին Արամ Խաչատրյան համերգասրահում:

Հեղինակի ստեղծագործությունները Հայաստանի պետական սիմֆոնիկ նվագախմբի նվագակցությամբ (գեղարվեստական ղեկավար և գլխավոր դիրիժոր Սերգեյ Սմբատյան) կատարեցին թավջութակահար Ժուլիեն Լաֆերիերը և դաշնակահար Ինգոլֆ Վունդերը։

«Ալեքսեյ Շորը հրաշալի կոմպոզիտոր է: Նա շատ հետաքրքիր հնչյունային համակարգի է տիրապետում»,-նշեց Սերգեյ Սմբատյանը:

Անդրադառնալով կոմպոզիտորի մարդ տեսակին՝ դիրիժորն ասաց, որ նա բացառիկ լավ անձնավորություն է: «Շորի գործերը կատարում են աշխարհի լավագույն մենակատարները: Դա խոսում է այն մասին, որ նրա երաժշտությունը յուրահատուկ է ու երկար կյանք ունի»,-ընդգծեց  Սմբատյանը:

Համերգին ներկա էր կոմպոզիտոր Տիգրան Մանսուրյանը, որի խոսքով՝ Ալեքսեյ Շորը հետաքրքիր անձնավորություն է: «Նրա՝ երաժշտության նկատմամբ մեծ սերն ինձ հիացնում է: Լինելով մաթեմատիկոս և լուրջ գիտնական՝ նա իրեն ամբողջությամբ նվիրել է երաժշտությանը: Այս իրողությունը փառատոնին գեղեցիկ երանգ է հաղորդում»,-ասաց մաեստրոն:

«Ժամանակակից դասականներ» կոմպոզիտորական փառատոնի կազմակերպիչներն են Հայաստանի պետական սիմֆոնիկ նվագախումբը, Եվրոպայի աջակցության մշակութային հիմնադրամը։ Փառատոնն անցկացվում է ՀՀ կրթության, գիտության, մշակույթի և սպորտի նախարարության աջակցությամբ։

 




youtube

Բոլոր նորությունները    


Haypost

New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ