Պետք է շարունակենք նույնությամբ. Մխիթարյան
2 րոպեի ընթերցում
![Պետք է շարունակենք նույնությամբ. Մխիթարյան](http://armenpress.am/resized/480/static/news/b/2019/02/965393.jpg)
ԵՐԵՎԱՆ, 25 ՓԵՏՐՎԱՐԻ, ԱՐՄԵՆՊՐԵՍ: Հայաստանի ֆուտբոլի ազգային թիմի կիսապաշտպան Հենրիխ Մխիթարյանի կարծիքով, «Արսենալ»-ի ֆուտբոլիստները պետք է շարունակեն նույնությամբ գործել հաջող արդյունքի համար:
«Հրաշալի առաջին խաղակես ստացվեց: Մենք չէինք խփի առաջին գոլը և Լենոյի հրաշալի «սեյվ»-ը չլիներ: Մենք պետք է շնորհակալ լինենք մեր դարպասապահին: Երկրորդ կեսում հակառակորդն ավելի շատ ընդգրկվեց խաղի մեջ, և մենք չկարողացանք իրացնել մեր հնարավորությունները»,-«Արմենպրես»-ի հաղորդմամբ` Մխիթարյանի խոսքը փոխանցում է «Արսենալի» պաշտոնական կայքը:
Ըստ Մխիթարյանի` «Արսենալ»-ի ֆուտբոլիստների համագործակցությունը հրաշալի է ստացվում: «Մենք պետք է շարունակենք նույն կերպ գործել և կենտրոնանալ հաջորդ խաղի վրա»,-ասել է հայ կիսապաշտպանը:
Անգլիայի ֆուտբոլի առաջնության 27-րդ տուրում «զինագործները» սեփական հարկի տակ ընդունեցին «Սաութհեմփթոն»-ին: Հանդիպման մեկնարկից ընդամենը 7 րոպե անց «Արսենալ»-ն առաջ անցավ հաշվի մեջ: Հենրիխ Մխիթարյանի հարված-փոխանցումից հետո խաղի հաշիվը բացեց Լակազեթը: Ընդամենը 10 րոպե անց Մխիթարյանն արդեն ինքը կրկնապատկեց հաշվի տարբերությունը՝ 2:0 հօգուտ «զինագործների»: Երկրորդ կեսին հաշվի մեջ փոփոխություն տեղի չունեցավ, և ի վերջո հանդիպումն այդպես էլ ավարտվեց՝ 2:0:
Հենրիխ Մխիթարյանը մասնակցեց ամբողջ խաղին: «Արսենալ»-ն այս հաղթանակից հետո բարձրացավ մրցաշարային աղյուսակում և այժմ 53 միավորով 4-րդ հորիզոնականում է: