ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության ոստիկանության պետ Վալերի Օսիպյանը շնորհավորական ուղերձ է հղել «Արմենպրես» լրատվական գործակալության հիմնադրման 100-ամյակի կապակցությամբ:

Ինչպես հաղորդում է «Արմենպրես»-ը, ՀՀ ոստիկանության պետի շնորհավորական ուղերձում, մասնավորապես, ասված է.

«Հարգելի բարեկամնե´ր: Հայաստանի Հանրապետության ոստիկանության կոլեգիայի անունից և անձամբ սրտանց շնորհավորում մեր հանրապետության ամենահին ու փորձառու տեղեկատվական հարթակի` «Արմենպրես» լրատվական գործակալության 100-ամյա հոբելյանի առթիվ: Տեղեկատվական գործունեությունը չի տեղավորվում հանրությանը լրահոսով ապահովելու շրջանակում. լրատվական ծառայությունները կոչված են շատ ավելիին` նպաստել հասարակության ձևավորմանն ու առաջընթացին, երկրում գաղափարախոսական դաշտի կազմավորմանը, քաղաքացու իրավական դաստիարակությանը և այլն: Լրատվական դաշտի խնդիրների թվարկումը կարելի է շարունակել, սակայն ընդհանրացումը մեկն է. լրատվական գործունեությունը ցանկացած երկրում ծառայում է պետականության ամրապնդմանը, հասարակության զարգացմանն ու քաղաքացու իրավունքների պաշտպանությանը: Եվ այդ առաքելության արժանապատիվ ու լիարժեք իրականացման գերազանց օրինակ է «Արմենպրես» գործակալության անձնվեր աշխատանքը Հայաստանի երեք հանրապետությունների բոլոր տասնամյակներին: Արմենպրեսականները իրենց մասնագիտական առաջնագծում ապահովել են մեր պետականության շարունակականությունը, սերունդներ են կրթել, ստեղծել լրատվական այն միջավայրը, որը լիարժեք ապահովում է այսօրվա քաղաքացու տեղեկացված լինելու իրավունքը: Համոզված եմ, որ աշխատանքային բարի ավանդույթները, պրոֆեսիոնալ հավատարմությունն ընտրած գործին և քաղաքացու հանդեպ հարգանքը այսուհետ էլ «Արմենպրեսի» գործունեության հիմքն ու առանցքն են լինելու: Կրկին շնորհավորում եմ հոբելյանական տարեդարձի առթիվ: Մաղթում եմ աշխատանքային սխրանքի նոր հարյուրամյակներ, և թող ձեր բարձր պրոֆեսիոնալիզմը միշտ արժանանա հանրության սպասմանն ու սիրուն»: