ԵՐԵՎԱՆ, 26 ԱՊՐԻԼԻ, ԱՐՄԵՆՊՐԵՍ: Հարավային Կորեայի նախագահի վարչակազմն ապրիլի 26-ին անցկացրել Է նախագահ Մուն Չժե Ինի եւ ԿԺԴՀ-ի առաջնորդ Կիմ Չեն Ընի միջեւ առաջիկա բանակցությունների եզրափակիչ փորձը: Ինչպես հաղորդել Է ՏԱՍՍ-ը, ճեպազրույցում այս մասին հայտարարել Է Կորեայի Հանրապետության նախագահի պաշտոնական ներկայացուցիչ Կիմ Ըյ Գյոմը, տեղեկացնում Է «Արմենպրես»-ը:

«Մենք անցկացրեցինք առաջիկա գագաթնաժողովի եզրափակիչ փորձը: Երկու ղեկավարների դերերը կատարել են հատուկ դերասաններ, ինչը թույլ Է տվել փորձն անցկացնել իրական գագաթնաժողովին առավելագույնս մոտեցված իրավիճակում»,- նշել Է նա: Կիմ Ըյ Գյոմը նաեւ ընդգծել Է, որ հարավկորեական կողմը փորձել Է, մասնավորապես, երկու պետությունների ղեկավարների ողջույնը եւ լուսանկարումը: «Պատվո պահապախումբը նույնպես փորձել Է ղեկավարների երաժշտական ողջույնը»,- հավելել Է նա:

Միջկորեական գագաթնաժողովի հիմնական միջոցառումները տեղի կունենան ապրիլի 27-ին: Հարավային Կորեայի նախագահ Մուն Չժե Ինն անձամբ կդիմավորի ԿԺԴՀ-ի առաջնորդ Կիմ Չեն Ընին սահմանազատիչ գծի մոտ, ինչից հետո երկու պետությունների ղեկավարները բանակցությունների համար կուղեւորվեն դեպի Խաղաղության տուն: