ՍՏԵՓԱՆԱԿԵՐՏ, 16  ՄԱՅԻՍԻ, ԱՐՄԵՆՊՐԵՍ-ԱՐՑԱԽՊՐԵՍ: «Թուֆենկյան» բարեգործական հիմնադրամի նախաձեռնությամբ Ասկերան քաղաքում հարմարավետ բնակարանային պայմաններով ապահովվել է զինվորական հաշմանդամ Սամվել Մեժլումյանի ընտանիքը:

Հիմնադրամի միջոցներով կատարվել են խոհանոցի կառուցման, սանհանգույցի վերանորոգման, նոր պատուհանների տեղադրման և այլ աշխատանքներ:

Սամվել Մեժլումյանը, ով առանձնատանը բնակվում է կնոջ, որդու և հարսի հետ, ասել է, որ անչափ գոհ է օգնության համար և նշել, որ այժմ շատ ավելի հեշտությամբ կարող է միայնակ հոգալ իր առօրյա ու կենցաղային խնդիրները:

«Թուֆենկյան» բարեգործական հիմնադրամի գործադիր տնօրեն Րաֆֆի Դուդակլյանը նշել է, որ վիրավոր զինծառայողներին բնակարանային հարմարավետ պայմաններով ապահովելու միտքն առաջացել է ապրիլյան պատերազմից հետո: «Որոշել ենք ապրիլյան պատերազմում հաշմանդամ դարձած զինծառայողներին ապահովել բնակարանով, կամ բարելավել նրանց բնակարանային կեցության պայմանները: Այսօր, սակայն աջակցությունը տրվել է 1992թ.-ին արցախյան պատերազմում վիրավորված ազատամարտիկին, քանի որ փորձում ենք չսահմանափակվել միայն ապրիլյան պատերազմում տուժածներով»,- ասել է Ր. Դուդակլյանը և հավելել, որ այս ծրագրով սա արդեն հիմնադրամի կողմից վեցերորդ բնակարանային աջակցությունն է:

Հիմնադրամի պատասխանատուի խոսքով՝ հաջորդ առանձնատան կառուցման աշխատանքները շուտով նախատեսում են սկսել Ասկերանի շրջանի Պատարա համայնքում: