Հայաստանում տարեկան 7-8 հազար քաղաքացի ավանդների դիմաց փոխհատուցում է ստանում

ԵՐԵՎԱՆ, 26 ՄԱՅԻՍԻ, ԱՐՄԵՆՊՐԵՍ: Յուրաքանչյուր տարի 7-8 հազար անձ Ավանդների փոխահատուցման ծրագրով ստանում է դրամական փոխհատուցում: Այդ նպատակով պետբյուջեով յուրաքանչյուր տարի հատկացվում է 1.5 միլիարդ դրամ: «Արմենպրես»-ի փոխանցմամբ` այս մասին Ազգային ժողովի սոցիալական հարցերի, ֆինանսավարկային և բյուջետային հարցերի մշտական հանձնաժողովների համատեղ նիստում «ՀՀ 2015թ. պետական բյուջեի կատարման մասին» տարեկան հաշվետվությունը ներկայացնելիս, ասաց Աշխատանքի և սոցիալական հարցերի նախարար Արտեմ Ասատրյանը:

Նա նկատեց, որ գումարները տրամադրվում են սոցիալական աջակցության ծրագրի շրջանակներում, և դասական իմաստով այն ոչ թե ավանդների վերադարձ է, այլ փոխհատուցում: «Թե Ազգային ժողովը, թե Կառավարությունը հաշվի են առել, որ դրանք տրամադրվեն այն քաղաքացիներին, ովքեր առաջնահերթ ունեն այդ սոցիալական կարիքը»,-ասաց նախարարը:

Նա նշեց, որ երեք սոցիալական խմբերի համար է ներկայում գործում ծրագիրը: «Առաջին խումբը տարեցներն են` ծնված մինչև 1931 թվականի դեկտեմբերի 31-ը, երկրորդ խումբը հայրենիքի պաշտպանությանը և մարտական գործողություններին մասնակցածները, մեկ բառով` ազատամարտիկները, երրորդ խումբը սահմանամերձ բնակավայրերի մեր քաղաքացիներն են: Մենք պետական բյուջեով նախատեսված միջոցները բաշխել ենք հետևյալ կերպ` 50 տոկոսը տարեցներին, 40 տոկոսը սահմանամերձ շրջանների բնակիչներին, 10-ը` ազատամարտիկներին: Յուրաքանչյուր ամիս ձևավորվում են տվյալ ամսվա հայտերն ու կատարվում վճարումները»,-տեղեկացրեց պաշտոնյան:

Ասատրյանի խոսքով` այս պահին հաշվառված անձանց թվաքանակի ու տրամադրվելիք գումարի միջին չափի համեմատությամբ` կարող են ասել, որ հաշվառվածներին դեռևս 16-18 ամսվա վճարելիք ունեն: «Այսօր նոր սոցիալական խմբի մասին խոսել, դեռևս ժամանակավրեպ է: Մենք չենք ուզում, որ անձինք, ովքեր հերթագրվում են, երկար մնան հերթերում: Կարծում եմ` մինչև 2017-ի բյուջետային գործընթացը սկսելը, մենք կունենանք ավելի կոնկրետ տեղեկատվություն, թե արդյոք ունենք առաջարկություն փոփոխություններ կատարվելու մասին կամ նոր խմբեր ներգրավելու»,-հավելեց Արտեմ Ասատրյանը: