ԳԱՎԱՌ, 17 ՀՈՒՆԻՍԻ, ԱՐՄԵՆՊՐԵՍ։ ՀՀ կառավարության 2024 թվականի հունիսի 14-ի հերթական նիստում որոշում է կայացվել՝ 672 միլիոն 827․1 հազար դրամ հատկացնել Մ-14, Մ-4-Շորժա-Վարդենիս միջպետական նշանակության ավտոճանապարհի Գեղամասար-Արեգունի 5,3 կիլոմետր հատվածի հիմնանորոգման համար։
Ինչպես «Արմենպրես»-ը տեղեկացավ Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչությունից, ծրագրով նախատեսվում է ճանապարհի նոր հիմքի կառուցում, ասֆալտբետոնյա երկշերտ ծածկի տեղադրում՝ 42 հազար 830 քառակուսի մետր մակերեսով։ Կտեղադրվեն նաև նոր կողնակներ, կիրականացվի ջրահեռացում, գծանշման և կահավորման աշխատանքներ։ Շինարարական աշխատանքները կիրականացնեն «Վասպուրականի ՃՇՇ» ՍՊԸ ճանապարհաշինարարները։ Ծրագիրը նախատեսվում է ավարտել 2024 թվականի ընթացքում։ Շինարարական աշխատանքների մեկնարկը կտրվի հունիս ամսի վերջերից։
Խոսրով Խլղաթյան