Երևան-Բաթումի-Երևան գնացքը շուտով կսկսի ուղևորափոխադրումները
1 րոպեի ընթերցում
![Երևան-Բաթումի-Երևան գնացքը շուտով կսկսի ուղևորափոխադրումները](http://armenpress.am/resized/480/storage/images/articles/2024/06/17/XEkoApYnj6ngQyTwAAuPPtgfyZJVVvGeeXFMuTLx.webp)
ԵՐԵՎԱՆ, 17 ՀՈՒՆԻՍԻ, ԱՐՄԵՆՊՐԵՍ։ «Հարավկովկասյան երկաթուղի» ընկերությունը հայտարարել է Երևան-Բաթումի-Երևան գնացքով ուղևորափոխադրումներն առաջիկայում սկսելու մասին։
«Արմենպրես»-ի հաղորդմամբ ընկերությունը Ֆեյսբուքի իր էջում հայտարարել է ՝ Հունիսի 24-ից երկու օրը մեկ կգործի Երևան-Բաթումի-Երևան գնացքը և
հանգստի նպատակով Վրաստան՝ Սև ծով, մեկնողներն արդեն կարող են օգտվել այդ հնարավորությունից։
Ընկերությունից հավելել են, որ չվացուցակի վերաբերյալ տեղեկատվությունն արդեն հասանելի է իրենց պաշտոնական կայքում։
Ավելի վաղ՝ հաղորդվել էր, որ հունիսի 14-ից վերականգնվել է Վրաստանի հետ երկաթուղային հաղորդակցությունը, որը խաթարվել էր Հայաստանի հյուսիսային շրջաններում ավերիչ ջրհեղեղից, որի հետևանքով վնասվել էր երկաթգծի ավելի քան 2 կմ հատվածը: