ՀՀ ԱԳ նախարարն ընդունել է ՄԱԿ-ի Հայաստանում ՊԳԿ նորանշանակ ներկայացուցչին
2 րոպեի ընթերցում
![ՀՀ ԱԳ նախարարն ընդունել է ՄԱԿ-ի Հայաստանում ՊԳԿ նորանշանակ ներկայացուցչին](http://armenpress.am/resized/480/static/news/b/2012/12/702337.jpg)
ԵՐԵՎԱՆ,11ԴԵԿՏԵՄԲԵՐԻ, ԱՐՄԵՆՊՐԵՍ:ՀՀ արտաքին գործերի նախարար Էդվարդ Նալբանդյանը դեկտեմբերի 11-ինընդունել է ՄԱԿ Պարենի և գյուղատնտեսության կազմակերպության (ՊԳԿ) Կենտրոնական և Արևելյան Եվրոպայի տարածաշրջանային ներկայացուցչի տեղակալ, Հայաստանում ՊԳԿ նորանշանակ ներկայացուցիչ Անտոնիո Ալոնզիին:
Ինչպես«Արմենպրես»-ին տեղեկացրին ՀՀ արտգործնախարարության մամուլի, տեղեկատվության եւ հասարակայնության հետ կապերի վարչությունից, շնորհավորելով Անտոնիո Ալոնզիին նշանակման կապակցությամբ` նախարար Նալբանդյանը հույս է հայտնել, որ նրա պաշտոնավարման ընթացքում էլ ավելի կզարգանա Հայաստանի և Պարենի և գյուղատնտեսության կազմակերպության միջև համագործակցությունը, և հավաստիացրել է, որ արտաքին գործերի նախարարությունը ամենայն աջակցություն կցուցաբերի նրա գործունեությանը:
Շնորհակալություն հայտնելով ընդունելության և բարեմաղթանքների համար՝ Անտոնիո Ալոնզին վստահեցրել է, որ առավելագույն ջանքերը կգործադրի Պարենի և գյուղատնտեսության կազմակերպության կողմից Հայաստանում իրականացվող ծրագրերն ընդլայնելու, Հայաստանի գյուղատնտեսության զարգացմանը նպաստելու նպատակով։
Զրույցի ընթացքում մտքեր են փոխանակվել Հայաստանի ու Պարենի և գյուղատնտեսության կազմակերպության բազմամյա համագործակցության և հնարավոր նոր նախագծերի իրականացման շուրջ։