Lufthansa-ն գործադուլի պատճառով չեղարկել է չվերթների 80 տոկոսը

ԵՐԵՎԱՆ, 9 ՄԱՐՏԻ, ԱՐՄԵՆՊՐԵՍ: Գերմանիայի առաջատար Lufthansa ավիաընկերության ցամաքային անձնակազմի նախազգուշական գործադուլը, որը սկսվել էր հինգշաբթի, ավարտվել է շաբաթ առավոտյան, ուստի վերջին երկու օրվա ընթացքում ավիաընկերությանը հաջողվել է իրականացնել բոլոր պլանավորված թռիչքների միայն 10-20%-ը։ Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։

«Lufthansa-ի վերգետնյա անձնակազմն ավարտեց երկօրյա նախազգուշական գործադուլը։ Աշխատակիցները աշխատանքի են վերադարձել իրենց հերթափոխի մեկնարկին ժամը 7.10-ին։ Վերջին երկու օրվա ընթացքում նախատեսված թռիչքների միայն 10%-ից 20%-ն է իրականացվել»,- ասված է ավիաընկերության տարածած հաղորդագրության մեջ։

Նշվում է, որ չնայած անձնակազմի կողմից աշխատանքի վերսկսմանը՝ ավիաընկերությունները զգուշացնում են թռիչքների հնարավոր չեղարկման մասին։

Ավելի վաղ հաղորդվել էր, որ Գերմանիայի երկրորդ խոշոր արհմիությունը՝ Ver.di-ն, հայտարարել է երկրի առաջատար Lufthansa ավիաընկերության ցամաքային անձնակազմի հերթական գործադուլի մասին։ Արհմիության տվյալներով՝ ավիաընկերությունը չի բավարարել հիմնական պահանջը, այն է՝ ավելացնել աշխատավարզձերը, բայց ոչ պակաս, քան 500 եվրոյով։ Բանակցությունների հինգերորդ փուլը տեղի կունենա մարտի 13-14-ը։