Մոտ 25 միլիոն իրանցիներ մասնակցել են Իսլամական հեղափոխության 45-ամյակի տոնակատարություններին
2 րոպեի ընթերցում
![Մոտ 25 միլիոն իրանցիներ մասնակցել են Իսլամական հեղափոխության 45-ամյակի տոնակատարություններին](http://armenpress.am/resized/480/static/news/b/2024/02/1130096.jpg)
ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ: Շուրջ 25 միլիոն մարդ է մասնակցել ամբողջ Իրանում Իսլամական հեղափոխության հաղթանակի 45-րդ տարեդարձին նվիրված տոնակատարություններին: Այս մասին «Արմենպրես»-ը տեղեկանում է ՏԱՍՍ գործակալությունից։
Նշվում է, որ անվտանգության հարցերով ներքին գործերի փոխնախարար Մաջիդ Միրահմադին Hamshahri թերթին հայտնել է, որ այս տարի փետրվարի 11-ին Իսլամական հեղափոխության հաղթանակին նվիրված տոնակատարություններին և տարբեր ցույցերին մասնակցած մարդկանց թիվը «անցյալ տարվա համեմատությամբ աճել է միջինն ավելի քան 20 %-ով, իսկ որոշ նահանգներում՝ ավելի քան 50 %»-ով: Ըստ պարբերականի՝ 2023 թվականին այս թիվը կազմել է մոտավորապես 21 միլիոն։
Փոխնախարարն ընդգծել է նաև, որ չնայած «տոնին ներկա քաղաքացիների թվի նվազեցմանը նպաստելու`թշնամիների փորձերին» և « Քերմանում տեղի ունեցած ահաբեկչության պատճառով երկրում իրավիճակն անապահով ներկայացնելու` որոշ լրատվամիջոցների փորձերին», նրանց ծրագրերն անհաջողության մատնվեցին:
Իրանում բնակվում է ավելի քան 88 միլիոն մարդ։
Իրանական տոմարով բահման ամսվա 22-ը, որն այս տարի համընկել է փետրվարի 11-ի հետ, երկրի գլխավոր ազգային տոներից մեկն է։ Այդ օրը համարվում է Իսլամական հեղափոխության վերջնական հաղթանակի օրն Իրանի վերջին շահ Մոհամմադ Ռեզա Փահլավիի կառավարման (1941-1979 թթ․) դեմ պայքարում։ Ուղիղ 45 տարի առաջ ամիսներ շարունակվող ցույցերից հետո բանակը հայտարարեց իր չեզոքության մասին, իսկ խորհրդարանը և ոստիկանությունն անցան բողոքողների կողմը։ Բահմանի 22-ն Իսլամական հեղափոխության տարեդարձի 10-օրյա տոնակատարության եզրափակիչ փուլն է: