ԼՂ-ից բռնի տեղահանվածների համար նախատեսված բեռով ինքնաթիռը Բուենոս Այրեսից Հայաստան կժամանի հոկտեմբերի 22-ի երեկոյան

ԲՈՒԵՆՈՍ ԱՅՐԵՍ, 22 ՀՈԿՏԵՄԲԵՐԻ, ԱՐՄԵՆՊՐԵՍ: Բուենոս Այրեսից hոկտեմբերի 21-ին Երևան է մեկնել հատուկ չվերթ, որը տեղափոխում է հումանիտար օգնություն՝ Ադրբեջանի կողմից կազմակերպված էթնիկ զտման արդյունքում Լեռնային Ղարաբաղից բռնի տեղահանված բնակչության համար:

«Արմենպրես»-ի հաղորդմամբ՝ Արգենտինայում, Ուրուգվայում, Չիլիում, Պերուում և Պարագվայում Հայաստանի դեսպանության «Ֆեյսբուք»-ի էջը տեղեկացնում է, որ թռիչքը կազմակերպել են Արգենտինայի արտաքին հարաբերությունների, միջազգային առևտրի և պաշտամունքի նախարարությունը և «Սպիտակ սաղավարտներ» գործակալությունը՝ համագործակցությամբ Էնրիկե Պինիեյրոյի «ՍոլիդԱիր» հիմնադրամի:

Դեսպանությունն իր խորին երախտիքն է հայտնում նաև Արգենտինայի հայ համայնքին, բոլոր համայնքային կառույցներին և անհատներին, ովքեր իրականություն են դարձրել այս հումանիտար առաքելությունն իրենց հայրենանվեր աշխատանքով:

Բուենոս Այրեսից Հայաստան եկող 10 հազար 865 կգ մարդասիրական օգնությունը ներառում է տաք հագուստ, կոշիկ, մանկական հիգիենայի պարագաներ, սրբիչներ, էլեկտրական տաքացնող սարքավորումներ և այլ իրեր։ Տեղափոխող ինքնաթիռը Հայաստանում կլինի հոկտեմբերի 22-ի երեկոյան։