Թուրքիայի ներքին գործերի նախարարն ԱՄՆ-ին մեղադրել է իր երկրի համար վնասակար քայլերի մեջ

ԵՐԵՎԱՆ, 3 ՓԵՏՐՎԱՐԻ, ԱՐՄԵՆՊՐԵՍ: Թուրքիայի ներքին գործերի նախարար Սուլեյման Սոյլուն ԱՄՆ-ին մեղադրել է եվրոպական երկրների վրա ազդեցության և Թուրքիայի դեմ վնասակար քայլեր իրականացնելու մեջ:

Այս մասին, ինչպես հաղորդում է «Արմենպրես»-ը, հայտնում է TASS-ը:

««Յուրաքանչյուր ամերիկացի դեսպան ինքն իրեն հարց է տալիս, թե ինչպես կարող է վնասել Թուրքիային, սա Թուրքիայի ամենամեծ դժբախտություններից մեկն է երկար տարիներ։ Նա հավաքում է այլ դեսպանների և փորձում նրանց խորհուրդներ տալ։ Նույնը անում են Եվրոպայում, ամերիկյան դեսպանատունն է կառավարում Եվրոպան»:

Նրանք մտածում էին, թե ինչ կարող են անել Թուրքիայում, բայց մի մարդ փչացրեց նրանց խաղը, դա Ռեջեփ Թայիփ Էրդողանն է: Ես այստեղ ամերիկյան դեսպանին ասում եմ, որ գիտեմ, թե որ լրագրողներին է հանձնարարություն տվել։ Հեռացրեք ձեր կեղտոտ ձեռքերը Թուրքիայից, ես հստակ գիտեմ, թե ինչ քայլեր եք ձեռնարկել և ինչպես եք ուզում խառնել Թուրքիան»:

Փետրվարի 3-ին Թուրքիայի ԱԳՆ են կանչվել դիվանագիտական ​​առաքելությունների ղեկավարները, այդ թվում՝ այն պետությունների, որոնք դադարեցրել են իրենց գլխավոր հյուպատոսությունների աշխատանքը Թուրքիայում (Բելգիա, Մեծ Բրիտանիա, Գերմանիա, Իտալիա, Նիդեռլանդներ, ԱՄՆ, Ֆրանսիա, Շվեյցարիա և Շվեդիա)։

ԱԳՆ-ն ընդգծել է, որ Թուրքիայի բոլոր դիվանագիտական ​​հաստատությունների անվտանգությունն ապահովվում է միջազգային պայմանագրերի հիման վրա։ Դեսպանների ուշադրությունը հրավիրվել է նաև ահաբեկչության դեմ պայքարում համագործակցության անհրաժեշտության վրա։ ԱԳՆ-ն մատնանշել է, որ արևմտյան երկրների կողմից ընդունված մոտեցումը ծառայում է ահաբեկչական կազմակերպությունների շահերին։

Թուրքիայի արտգործնախարար Մևլութ Չավուշօղլուն մի շարք արևմտյան երկրների, որոնք անվտանգության սպառնալիքների պատճառով փակել են Թուրքիայում իրենց հյուպատոսությունները, մեղադրել է դաշնակցային պարտավորությունները չկատարելու մեջ։