Մինչև 2 տարեկան երեխաների նպաստի չափը կբարձրանա, կխրախուսվեն աշխատանքի վերադարձող մայրերը

ԵՐԵՎԱՆ, 27 ՀՈԿՏԵՄԲԵՐԻ, ԱՐՄԵՆՊՐԵՍ: 2023 թվականի հունվարի 1-ից մինչև 2 տարեկան երեխաների նպաստի չափը կբարձրանա: «Արմենպրես»-ի մամուլի սրահում հրավիրված ասուլիսում ՀՀ աշխատանքի և սոցիալական հարցերի նախարարության կենսաթոշակային ապահովության և այլ դրամական վճարների վարչության պետ Անահիտ Գալստյան տեղեկացրեց, որ ներկայիս 28 հազար 600-ի փոխարեն նպաստի չափը կդառնա 31 հազար 600:

«Եթե երեխան ծնվել է 2023 թվականի հունվարի 1-ից հետո ու մայրը չի աշխատում, ապա պետությունը վճարում է ամսական 31 հազար 600 դրամ: Նույնքան կստանա նաև աշխատող մայրն, ով գտնվում է երեխայի խնամքի արձակուրդում»,-ասաց Անահիտ Գալստյանը:

Ընդ որում, եթե այսօր քաղաքացիաիրավական պայմանագրով աշխատողները, անհատ ձեռնարկատերերը չեն ստանում երեխայի խնամքի նպաստ, ապա 2023 թվականի հունվարի 1-ից նրանք ևս կստանան 31 հազար 600 դրամ՝ անկախ այն հանգամանքից, թե որ բնակավայրում են հաշվառված:

Պետությունը որդեգրում է այնպիսի քաղաքականություն, որ խրախուսվեն երեխայի խնամքի արձակուրդից աշխատանքի վերադարձող մայրերը: Մասնավորապես, եթե խնամքի արձակուրդում գտնվող մայրը վերադառնում է աշխատանքի, ապա կստանա 37 հազար 500 դրամ: