Ժամանակը Երևանում՝ 11:07:36,   3 Հուլիս 2022

Նոր ինտերակտիվ քարտեզը աշակերտներին հնարավորություն կտա տեսնել պատմության հետաքրքիր դեմքերն ու դեպքերը՝ տարածության ու ժամանակի մեջ

Նոր ինտերակտիվ քարտեզը աշակերտներին հնարավորություն կտա տեսնել 
պատմության հետաքրքիր դեմքերն ու դեպքերը՝ տարածության ու ժամանակի մեջ

ԵՐԵՎԱՆ, 23 ՀՈՒՆԻՍԻ, ԱՐՄԵՆՊՐԵՍ: Նոր ինտերակտիվ քարտեզի շնորհիվ ուսուցիչների ու աշակերտների համար դպրոցներում կներդրվի դասը վիզուալիզացնող ինտերակտիվ կրթական գործիք՝ օգտագործելով նոր տեխնոլոգիական լուծումներ և ուսուցման հնարավորություններ: Այստեղ համատեղվել են և՛ գիտական միտքը, և՛ 21-րդ դարի հասանելի տեխնիկական հնարավորությունները:

«Արմենպրես»-ի հետ զրույցում՝  «Վիզուալ Հայաստան» հիմնադրամի բովանդակության, հաղորդակցության, միջոցառումների պատասխանատու Արևիկ Ավետիսյանը նշեց, որ կրթական հարթակն իրենից առաջին հերթին ներկայացնում է «Աշխարհացույց․ինտերակտիվ քարտեզ» ծրագիրը, որն առաջարկում է «Հայոց պատմություն» առարկայի դասավանդման ինտերակտիվություն և բովանդակության վիզուալիզացիա՝ համալրված համապատասխան գործիքակազմով, պատմության հետաքրքիր դրվագներով, ֆիլտրերով, որոնողական համակարգով և այլն:

«Մենք առարկաների սահմանափակում չենք ունենալու, ուղղակի ծրագիրը պիլոտային է, այժմ աշխատում ենք տեխնիկական և բովանդակային հնարավորությունների զարգացման ուղղությամբ: Ծրագրում այժմ ներառված է միայն «Հայոց պատմություն» առարկան՝ 6-րդ դասարանի հայոց պատմության ու համաշխարհային պատմության դասագրքերի նյութով»,- ասաց նա:

Արևիկ Ավետիսյանն ընդգծեց, որ այն պատմական ցանկացած իրադարձություն կամ անուն կապում է տարածության ու ժամանակի հետ՝ հնարավորություն տալով դասավանդողին իր խոսքն առավել պատկերավոր ու հանրամատչելի մատուցել աշակերտներին։

«Այս պահի դրությամբ ինտերակտիվ հարթակը ստեղծված է դասագրքի հիման վրա, որպեսզի ուսուցչի վրա լրացուցիչ ծանրաբեռնվածություն չընկնի: Օրինակ, եթե անհրաժեշտ է Վանի թագավորությունը, նա  ընտրում է դասը և մտնելով համակարգի այդ բաժին, տեսնում է այդ դասին համապատասխանող բոլոր դեմքերը իրադարձությունները, թվականները և նաև այդ ժամանակին համահունչ համաշխարհային իրադարձությունները:

Ապրիլ-մայիս ամիսներին որոշ դպրոցներում փորձարկումներ իրականացրել ենք և մի շարք տնօրեններ գնահատել են ծրագրի արժեքը, դպրոցները վերազինել են տեխնիկապես և պատրաստ են գնալ նորարարությունների և համագործակցությունների»,- ասաց նա:

Մասնագետը հավելեց, որ համագործակցության և գործընկերության շնորհիվ փոքր քայլերով փորձում են գնալ առաջ և ապագայում նախատեսում են ընդլայնել քարտեզի հնարավորությունները՝ ներառելով այլ ժամանակաշրջաններ և առարկաներ: Շատ ոգևորող է այն, որ ծրագիրը ստեղծվել է հայկական միջավայրում և նպաստելու է ազգային կրթությանը հզորացմանը: Սեպտեմբերին արդեն 6-րդ դասարանի Հայոց պատմության ամբողջ նյութը կլինի համակարգում

«Ուսուցիչների հետ մշտական կապի մեջ ենք և մինչև ուսումնական տարվա սկիզբ մի քանի սեմինարներ ենք իրականացնելու, որպեսզի ծանոթանան Աշխարհացույց ծրագրին, ինտերակտիվ քարտեզին և դրա կիրառմանը:

Ինտերակտիվ քարտեզը կարող է դրական ազդեցություն ունենալ նաև հատուկ կարիքավոր՝ ինչպես տեսողական, այնպես էլ լսողական խնդիրներով երեխաների համար, որովհետև մենք ունենալու ենք նաև ձայնային տարբերակ, տեսահամակարգ, ամեն ինչ արված է, որ լինի բոլորին հասանելի:

Ցանկացած ոլորտի թերությունը գալիս է կրթությունից, պետք է այնտեղ շատ ամուր հիմք դրվի, և կարծում ենք արդյունքը շատ արագ կերևա, որովհետև ունենք շատ ընդունակ, խելացի սերունդ և շատ պատրաստակամ ուսուցիչներ, որոնք պատրաստ են ընդունելու և յուրացնելու յուրաքանչյուր նորարարություն՝ ինչը կնպաստի որակյալ կրթություն ապահովելուն»,- ասաց Արևիկ Ավետիսյանը:

Ամփոփելով՝ մասնագետն ընդգծեց, որ կրթական գործիքն ուսուցիչների շրջանում կնպաստի դասավանդման որակի բարձրացմանը, աշակերտների հետ ավելի արդյունավետ և ժամանակին համահունչ տեխնոլոգիական մեթոդներով հաղորդակցությանը, ուսուցչի կարողությունների լիարժեք իրացմանը, դասավանդվող առարկայի վերաբերյալ նոր գիտելիքներ ձեռք բերելուն, ուսուցչի դերի ու հեղինակության բարձրացմանը, տեխնոլոգիական գիտելիքների կուտակմանն ու հմտացմանը, ինչպես նաև ուսուցիչ-աշակերտ կապի ամրապնդմանը:

Գայանե Գաբոյան

Լուսանկարները՝ Հայկ Բադալյանի








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]