Ժամանակը Երևանում՝ 11:07:36,   29 Հունիս 2022

«Դիմադրություն» շարժումը շարունակելու է ավտոերթերն ու ակցիաները

«Դիմադրություն» շարժումը շարունակելու է ավտոերթերն ու ակցիաները
ԵՐԵՎԱՆ, 11 ՄԱՅԻՍԻ, ԱՐՄԵՆՊՐԵՍ: «Դիմադրություն» շարժման մասնակիցները մայիսի 11-ին անհնազանդության երթերն ու ակցիաներն ավանդույթի համաձայն ավարտեցին Ֆրանսիայի հրապարակում:
«Արմենպրես»-ի փոխանցմամբ, մայիսի 11-ին ժամը 12:00-ից շարժման անդամներն իրազեկման նպատակով ավտոերթեր էին սկսել իրականացնել մայրաքաղաքի տարբեր հատվածներում: Արդեն 16:00-ին կազմակերպվեց հանրահավաք Ֆրանսիայի հրապարակում, որի մասնակիցները սկսեցին քայլերթ իրականացնել Երևանի փողոցներով: «Դիմադրություն» շարժման անդամները 18:00-ի մոտակայքում քայլերթով հասան դեպի Երևանի քաղաքապետարան և փակեցին քաղաքապետարանի բոլոր մուտքերը՝ կոչ անելով շենքի ներսում գտնվող աշխատակիցներին միանալ իրենց: Մոտ մեկ ժամ անց ակցիայի մասնակիցները, բացելով քաղաքապետարանի ելքերը, շարունակեցին քայլերթն ու հասան Ֆրանսիայի հրապարակ, որտեղ օրվա ավարտին կազմակերպվեց հանրահավաք:
Հանրահավաքի ավարտին ելույթ ունեցավ ՀՅԴ Գերագույն մարմնի ներկայացուցիչ Իշխան Սաղաթելյանը, ով հայտարարեց, որ մայիսի 12-ին առավոտվանից շարունակվելու են բողոքի և անհնազանդության ակցիաները:
«Պետք է ավելացնել մեր ակցիաների ու մասնակիցների թիվը: Սա յուրաքանչյուրիս խնդիրն է, այս օրերին դրա վրա ավելի ինտենսիվ պետք է աշխատել: Վաղը շարունակելու ենք ավտոերթերը»,- հայտարարել է Սաղաթելյանը՝ հայտնելով, որ երթերից հետո կրկին լինելու են բողոքի ակցիաներ, իսկ 16:00-ին՝ հանրահավաք Ֆրանսիայի հրապարակում:







youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]