ԵՐԵՎԱՆ, 15 ՄԱՐՏԻ, ԱՐՄԵՆՊՐԵՍ: Հայաստանյան դպրոցներում նախնական զինվորական պատրաստություն (ՆԶՊ) առարկայի ծրագիրը վերաթարմացվել է, ինչի արդյունքում նոր թեմաներ են ավելացել:

«Արմենպրես»-ի հետ զրույցում ՆԶՊ մասնագետ, Մոնթե Մելքոնյանի անվան ռազմամարզական վարժարանի փոխտնօրեն Արթուր Կարապետյանը նշեց, որ «Նախնական զինվորական պատրաստություն» առարկայի ծրագիրը և չափորոշիչը մշակվել է՝ հիմք ընդունելով հանրակրթության պետական առարկայական նոր չափորոշիչները:

Վերաթարմացումներ ՆԶՊ առարկայում

«ՆԶՊ առարկայի ծրագիրը վերաթարմացնելու կարիք ունի այն պատճառով, որ մեր տարածաշրջանը զարգացման և փոփոխման փուլերում է, և, իհարկե, առարկան վերաթարմացնելն անհրաժեշտություն էր: Առարկայի էական փոփոխություններից մեկն այն է, որ մենք ավելի շատ ուշադրություն ենք սկսել դարձնել գործնական պարապմունքների վրա, քչացել են տեսական դասերը: Ավելացել են նոր թեմաներ՝ մարտավարաֆիզիկական պատրաստություն, որի ժամանակ աշակերտները ֆիզիկական պատրաստություն են անցնելու, պայմանական ասած՝ մարտադաշտում ինչպիսի ֆիզիկական պատրաստություն է պետք, որպեսզի նրանք ճիշտ դրսևորեն իրենց ստեղծված իրադրությունում: Առարկայի այս թեմաները սկսելու են սովորել 8-10-րդ դասարաններում»,- նշեց ռազմական մասնագետը:

Հոգեբանական պատրաստությունը որպես կարևոր բաղկացուցիչ մաս աշակերտների հետագա կյանքում

Կարապետյանի խոսքով՝ 11-րդ և 12-րդ դասարաններում աշակերտներն ավելի շատ ուսումնասիրելու են այլ թեմաներ՝ ռազմական տեղագրություն, մարտավարության հիմունքներ:

ՆԶՊ-ի նորություններից մեկը նաև հոգեբանական պատրաստությունն է, որն ունի 2 ասպեկտ՝ առաջինը՝ հոգեբանական պատրաստություն արտակարգ իրավիճակներում: Մյուսը տղաների համար է, ովքեր դպրոցն ավարտելուց հետո գնում են բանակ, փոխում են միջավայրը, հետևաբար կարող են առաջանալ հոգեբանական որոշ խնդիրներ: Կարապետյանն ասաց, որ այդ թեման հետագայում կօգնի աշակերտներին, որպեսզի նման իրավիճակները կարողանան հեշտ հաղթահարել:

Աշակերտներն ուսումնասիրելու են ինժեներական պատրաստություն թեման

«Մենք առանձնացրել ենք և հստակ թեմա ենք դարձրել նաև ինժեներական պատրաստությունը, ինչը մեր երկրում մեծ կարևորություն ունի: Լինելու են նաև գործնական պարապմունքներ: Աշակերտները սովորելու են ճիշտ ձևով անհատական խրամատներ փորել, ընդհանուր խրամատներ և խրամախորշեր պատրաստել, ճիշտ քողարկվել տեղանքի մարտավարական հատկությունները հաշվի առնելով: Այս ամենը սերտելով, մարտական իրավիճակներում նրանք կկարողանան կյանքի վտանգները հասցնել նվազագույնի»,- ասաց բանախոսը:

Նրա խոսքով՝ նորություններից է նաև կապի և տեղեկատվական անվտանգությունը, ինչը խիստ անհրաժեշտություն է:

«Երեխաները հստակ պատկերացում կունենան, թե որքան կարևոր են հակառակորդի համար մեր տեղեկությունները և, թե որքան կարևոր է դրանց գաղտնիությունը պահելը: ՆԶՊ առարկայում առանձնացրել ենք նաև իրավական պատրաստություն թեման, որը նորություն չի, սակայն նախատեսվում են նոր ենթաթեմաներ: Մենք ուսումնասիրելու ենք զինվորական ներքին կանոնակարգերը և կարգավորումները»,- նշեց Կարապետյանը:

Գործնական պարապմունքներ դպրոցի պատերից դուրս

«Շատ կարևոր եմ համարում ընդգծել, որ գործնական դասերը չեն ամփոփվելու միայն դպրոցում, մենք անց ենք կացնելու նաև դաշտային (ճամբարային) պարապմունքներ: Նախարարությունն այս ամենի վերաբերյալ առանձին կարգ է մշակել»,-նշեց ռազմագիտության մասնագետը:

Նրա խոսքով՝ այդ պարապմունքները հնարավորություն կտան իրականին մոտ պայմաններում մատուցել նյութը, ցուցադրել պահանջվող գործողությունները, իսկ սովորողներին` գործնական վարժանքներով յուրացնել թեման: Բացի երկարաժամկետ ճամբարային փորձաշրջանից, մասնագետները նպատակահարմար են համարում կազմակերպել դաշտային պարապմունքներ շաբաթ կամ կիրակի օրերին՝ աշակերտների և ծնողների համաձայնությամբ, դպրոցի ղեկավարության գիտությամբ:

«Ճամբարային պայմանները առավել մեծ հնարավորություններ են ստեղծում պարապմունքներն անցկացնել ինչպես ցերեկային, այնպես էլ երեկոյան ժամերին, ուսուցանել առանձին թեմաներ՝ «Կողմնորոշում աստղերով», «Տեղաշարժ մթության մեջ», «Պահակային ծառայության անցկացում», «Քողարկված կրակատեղի պատրաստում» և այլն: Ճամբարային պատրաստության և ռազմամարզական խաղերի ընթացքում կարող են լուծվել մի շարք խնդիրներ՝ բնական միջավայրում տեսական գիտելիքների փորձնական ստուգում և ամրապնդում, հմտությունների և կարողությունների զարգացում անհատական և խմբային վարժանքներով, իրավիճակների մոդելավորում և իրական պայմաններում սովորողների խմբային համագործակցության զարգացում, հոգեբանական կայունության ապահովում, սեփական ունակությունները ճանաչելու և ինքնադրսևորվելու հնարավորություն»,- ընդգծեց Կարապետյանը։

Նա շեշտեց, որ Հանրակրթական պետական չափորոշիչները Կառավարության որոշմամբ ընդունվել են, սակայն ՆԶՊ առարկայի ծրագրի չափորոշիչը դեռևս հանրային քննարկման փուլում է: Ճամբարային պարապմունքներ իրականացնելու կարգի հանրային քննարկումն արդեն ավարտվել է: Մասնագետի կարծիքով կարգն այս տարի հունիսին կանցնի առաջին փորձնական փուլը:

Լիլիթ Դեմուրյան