ԵՐԵՎԱՆ, 15 ՓԵՏՐՎԱՐԻ, ԱՐՄԵՆՊՐԵՍ: Հայաստանում տարեկան գրանցվում են մանկական (0-18 տարեկան) քաղցկեղի 80-100 առաջնակի դեպքեր:

«Արմենպրես»-ի հաղորդմամբ՝ այս մասին մամուլի ասուլիսի ժամանակ ասաց Հայաստանի մանկական քաղցկեղի և արյան հիվանդությունների կենտրոնի ղեկավար Գևորգ Թամամյանը:

«Բարձր եկամուտ ունեցող երկրներում հիվանդ երեխաների 80 տոկոսից ավելին բաժանվում են քաղցկեղից, մինչդեռ ցածր եկամուտներ ունեցող շատ պետութուններում այս ցուցանիշը կազմում է ընդամենը 20 տոկոս: Հայաստանն իր ցուցանիշներով մոտ է զարգացած երկրներին: Համաձայն վիճակագրության, մեր ապրելիության ցուցանիշները հասնում են 70, 75, երբեմն էլ 80 տոկոսին, դա էլ այն պայմաններում, երբ միջոցները բավական սուղ են մեր երկրում»,- նշեց Թամամյանը:

Նրա խոսքով՝ վերջին տարիներին իրենք ախտորոշում են հիվանդությունը, և հիվանդների մեծամասնությունը բուժումը շարունակում է Հայաստանում: