391.27
Ամեն շաբաթ 40-50 նոր գործատու է միանում զինվորների հիմնադրամի «Դարձնենք մեկը երկու» նախաձեռնությանը
2 րոպեի ընթերցում
ԵՐԵՎԱՆ, 24 ՆՈՅԵՄԲԵՐԻ, ԱՐՄԵՆՊՐԵՍ: Զինվորների ապահովագրության հիմնադրամի «Դարձնենք մեկը երկու» նախաձեռնությունը դրական արձագանքների է արժանացել: Նախաձեռնությանը միանալու համար արդեն բազմաթիվ գործատուներից ստացվում են դիմումներ:
«Արմենպրես»-ի մամուլի սրահում հրավիրված ասուլիսում այս մասին նշեց «Զինվորների ապահովագրության հիմնադրամի» գործադիր տնօրեն Վարուժան Ավետիքյանը:
«Նախաձեռնության շրջանակում գործատուն հնարավորություն է ունենում իր աշխատակիցների կողմից պարտադիր վճար հանդիսացող ամսական 1000 դրամները բազմապատկել: Գործատուներ կան, որոնք որոշել են այդ գումարը կրկնապատկել, ոմանք՝ քառապատկել: Գործատուներ կան, որոնք իրենց աշխատողներին են թողել ավելացված գումարի չափը ավելացնելու հարցը, այնուհետև գործատուները այն համաֆինանսավորում են»,- ասաց Վարուժան Ավետիքյանը: Այդ գործընթացը հեշտացված է, պարզեցված պայմանագիրը տեղադրված է հիմնադրամի կայքում, որից գործատուները կարող են օգտվել:
Վարուժան Ավետիքյանը տեղեկացրեց, որ յուրաքանչյուր շաբաթ 40-50 նոր գործատու է միանում «Դարձնենք մեկը երկու» նախաձեռնությանը: Հայաստանում կա շուրջ 55 հազար գործատու: Վարուժան Ավետիքյանը նկատեց, որ այդ տեսանկյունից խոշոր գործատուների մոտ շարժում է նկատվում, ինչը կարող է ոգևորել ավելի փոքր գործատուներին:
Բաժանորդագրվեք մեր ալիքին Telegram-ում