Ադրբեջանը լայնածավալ զորավարժություններ կանցկացնի

ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանի զինված ուժերը սկսել են լայնածավալ զորավարժություններ իրականացնել: Ինչպես հաղորդում է «Արմենպրես»-ը` վկայակոչելով ադրբեջանական APA գործակալությունը, այս մասին հայտարարել է Ադրբեջանի պաշտպանության նախարարության մամուլի ծառայությունը:

Զորավարժություններին մասնակցելու են ցամաքային, ռազմաօդային և ռազմածովային ուժերը: Մամլո ծառայությունը չի նշել զորավարժությունների իրականացման հստակ վայրը, սակայն հաղորդել է, որ զորավարժանքներն իրականանալու են Ադրբեջանի պաշտպանության նախարար, գեներալ-գնդապետ Սաֆար Աբիևի ղեկավարությամբ:

Ավելի վաղ ադրբեջանական publika.az լրատվական կայքը հայտնել էր, որ լայնածավալ զորավարժություններն ադրբեջանական բանակն անցկացնում է «լեռնային պայմաններում գտնվող տարբեր զորամիավորումների միջեւ կապն ամրապնդելու, մարտական եւ մարտավարական պատրաստվածությունը մեծացնելու» նպատակով: Կայքը հայտնում է, որ զորավարժանքներին մասնակցում են նաեւ տարբեր նշանակության «հատուկ» զորամիավորումններ: