Հայաստանը հիշում է քեզ. Երևանում հարգեցին Հրանտ Դինքի հիշատակը
ԵՐԵՎԱՆ, 19 ՀՈՒՆՎԱՐԻ, ԱՐՄԵՆՊՐԵՍ: Պոլսահայ լրագրող, «Ակոս» պարբերականի հիմնադիր և գլխավոր խմբագիր Հրանտ Դինքի սպանության 9-րդ տարելիցի կապակցությամբ Երևանում հիշատակի միջոցառում անցկացվեց: Ստամբուլում գործող «Նոր զարթոնք» հասարակական կազմակերպությունը և «Հրանտ Դինք» հիմնադրամը Երևանի քաղաքապետարանի մոտ ստորագրահավաք անցկացրեցին՝ Երևանի փողոցներից մեկը Դինքի անունով կոչելու նպատակով:
Ստորագրահավաքին միացան մի քանի տասնյակ քաղաքացիներ: Երևանի քաղաքապետարանի մոտ շուրջ մեկ ժամ լուռ ակցիա անցկացնելու հետո կազմակերպիչները հավաքված ստորագրություններով Երևանի քաղաքի փողոցներից մեկը Հրանտ Դինքի անունով անվանելու պահանջով դիմում հանձնեցին Երևանի քաղաքապետարան:
«Արմենպրես»-ի հետ զրույցում «Նոր զարթոնք» հասարակական կազմակերպության երևանյան ներկայացուցիչ Նշան Կյուրեղը ցավով նշեց, որ Հայաստանում Հրանտ Դինքի հիշատակի օրերին լայնածավալ միջոցառումներ և ցույցեր չեն կազմակերպվում: «Շատ ցանկալի կլիներ, որ Հայաստանում գործող կուսակցությունները գոնե այս օրերին Դինքի հիշատակին նվիրված միջոցառումներ և ցույցեր կազմակերպեին, ինչպես օրինակ լինում է Ստամբուլում: Հիմա մեր նպատակն է հասնել նրան, որ Երևանի փողոցներից մեկն անվանվի Հրանտ Դինքի անունով, որովհետև մենք Հայաստանում Հրանտ Դինքի անունն այդքան էլ հաճախ չենք լսում: Ես շատ կցանկանայի, որ 2017թ., երբ կլրանա Դինքի մահվան 10-րդ տարելիցը, Հայաստանի կուսակցություններն ավելի ակտիվ լինեն և լայնածավալ միջոցառումներ կազմակերպեն»,- ասաց նա:
Ստորագրահավաքի արդյունքները և դիմումը Երևանի քաղաքապետարան հանձնելուց հետո ակցիայի մասնակիցները քայլերթով շարժվեցին դեպի Հանրապետության հրապարակ: «Հայաստանը հիշում է քեզ». «Մենք բոլորս Հրանտ ենք», «Փողոց, պայքար, ազատություն» վանկարկումներով ակցիայի մասնակիցները Գրիգոր Լուսավորիչ փողոցով հասան Մաշտոցի պողոտա, որտեղից էլ Ամիրյան փողոցով դուրս եկան Հանրապետության հրապարակ: Հանրապետության հրապարակում շարունակվեց ստորագրահավաքը, որին միացան բազմաթիվ քաղաքացիներ:
Հանրապետության հրապարակում Հրանտ Դինքի հիշատակին նվիրված ակցիան ավարտվեց մոմավառությամբ:
Բաժանորդագրվեք մեր ալիքին Telegram-ում