Օտարերկրյա դիվանագետները Երևանում հեծանվավազքի մրցույթի կմասնակցեն
ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ: ՀՀ սպորտի և երիտասարդության հարցերի նախարարության և Երևանի քաղաքապետարանի, «Ջի Էմ Ջի մեդիա գրուպ» ընկերության նախաձեռնությամբ Երևանում Սահմանդրության օրվա առիթով հուլիսի 5-ին կկայանա հեծանվավազքի մրցույթ:
Հեծանվավազքին կմասնակցեն Հայաստանում գործող պետական կառույցների ներկայացուցիչները, գործարարներ, դիվանագիտական կառույցների ներկայացուցիչներ: «Այս միջոցառումը շատ համահունչ է նախարարության կողմից իրակացվող միջոցառմանը: Նախարար ողջունել է առաջարկությունը և փորձել աջակցել: Այս տարի, բացի նախարարության աշխատակիցների մասնակցությունից, նախարարությունն իր վրա է վերցրել կազմակերպչական աշխատանքերը»,-«Արմենպրես»-ի հաղորդմամբ, լրագրողների հետ հանդիպման ժամանակ ասաց նախարարի մամուլի խոսնակ Աստղիկ Մարտիրոսյանը:
«Ջի Էմ Ջի մեդիա գրուպ» ընկերության ներկայացուցիչ Մարիամ Մանուկյանի խոսքով` հեծանվավազքը կլինի մրցութային և առաջինից երրորդ տեղերը զբաղեցրած մասնակիցները կստանան համապատասխան մրցանակներ և պատվոգրեր: «Մրցույթին մինչ օրս մասնակցության հայտ են ներկայացրել Բրազիլիայի, Հնդկաստանի, ԱՄՆ-ի և Ռումինիայի դեսպանատան աշխատակիցները: Հեծանվավազքին կմասնակցեն անձամբ դեսպանները»,-ասաց Մանուկյանը:
Մրցույթին հնարավոր է մասնակցի նաև ՀՀ սպորտի և երիտասարդության նախարար Գաբրիել Ղազարյանը: Մրցավազքը կսկսվի Հանրապետության հրապարակից և կավարտվի Երևանի քաղաքապետարանի մոտ` 5 կմ երկարությամբ: Մրցույթն անցկացվում է արդեն երրորդ տարին և նվիրված է Սահմանդրության օրվան:
Բաժանորդագրվեք մեր ալիքին Telegram-ում