Կապանցի նորարար ուսուցիչներն արժանացան պարգեւների,

ԿԱՊԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ:«Կապանի նորարար ուսուցիչ» մրցույթում 1-3-րդ մրցանակային տեղեր զբաղեցրած ուսուցիչները նոյեմբերի 7-ին քաղաքապետ Աշոտ Հայրապետյանի կողմից արժանացան պատվոգրերի եւ դրամական պարգեւների: Քաղաքապետը շնորհակալագրեր հանձնեց նաեւ մրցույթի մյուս յոթ մասնակիցներին:

«Վաղուց ժամանակն է, որպեսզի է ավանդական ուսուցման մեթոդները կիրառվեն նորարար միջոցների գործածմամբ: Անհնար է որակյալ ու մատչելի ուսուցումը պատկերացնել այդ գործում չներգրավելով տեղեկատվական տեխնոլոգիաները: Այսօր անհրաժեշտ է նոր մտահղացումներով ու նոր մեթոդներով մտնել դասարան ու կրթել այսօրվա աշակերտին», - «Արմենպրես»-ի հաղորդմամբ` ասաց քաղաքապետն եւ շնորհակալություն հայտնեց այն բոլոր ուսուցիչներին, ովքեր զբաղված են այդ աշխատանքով:

«Կապանի նորարար ուսուցիչ» ծրագիրը, որը նպատակ ունի ընդլայնել ուսուցիչների մասնագիտական կարողությունների կատարելագործման հնարավորությունները, «Կապանի ուսուցիչներ» ՀԿ-ի հետ Սյունիքում սկսել է իրականացնել «Հայաստանի պատանեկան նվաճումներ» կազմակերպությունը: Ֆինանսավորումը կատարվել է «Վորլդ Վիժն» բարեգործական կազմակերպության կողմից: Ծրագրին աջակցել են Կապանի քաղաքապետարանն ու Սյունիքի մարզպետարանը: Ծրագիրն ունեցել է 3 բաղադրիչ` դասընթացների կազմակերպում, ուսուցիչների փորձի փոխանակման հնարավորությունների ընդլայնում եւ մրցույթի կազմակերպում: Ուսուցիչներին մեթոդական աջակցություն ցուցաբերելու նպատակով տպագրվել է «Աշակերտի թղթապանակ» ձեռնարկը, որի հեղինակն է Կրթության ազգային ինստիտուտի գլխավոր մասնագետ Լիլիթ Բաբայանը:

«Այսօր մեր ուսուցիչներն օգտվում են պատրաստի առաջարկվող ուսումնամեթոդական նյութերից եւ դժվարանում են ինքնուրույն ստեղծել այդ նյութերը: Իսկ դա չի կարող նպաստել սովորողների ինքնուրույն զարգացմանը», - քաղաքապետի հետ հանդիպմանն ասաց Լիլիթ Բաբայանը:

Մրցույթն անցկացվել է համացանցում` վիրտուալ հարթակում, 3` դպրոցական, վիրտուալ ու համայնքային փուլերով: Մրցույթին մասնակցել են Կապանի 9 դպրոցներից 10 նորարար ուսուցիչներ:

Գոհար Իսախանյան