Հայ սուսերամարտիկները 4 մեդալ նվաճեցին
ԵՐԵՎԱՆ, 22 ՍԵՊՏԵՄԲԵՐԻ,ԱՐՄԵՆՊՐԵՍ: Հայաստանի սուսերամարտիկները 4 մեդալ նվաճեցին Երեւանի «Դինամո» մարզասրահում ավարտված սուսերամարտի միջազգային մրցաշարում, որը նվիրված Էր Հայաստանի Հանրապետության Անկախության օրվան:
Ինչպես տեղեկացնում «Արմենպրես»-ը, Էմիլ Դանիելյանը եւ Մանվել Հովհաննիսյանը զբաղեցրին 2-րդ և 3-րդ տեղերը, համապատասխանաբար ճկասուսերակիրների եւ խոցասուսերակիրների մրցումներում, իսկ աղջիկների մրցումներում բրոնզե մեդալներ նվաճեցին Էմմա Պողոսովան՝ խոցասուսերակիրների եւ Երփինե Աթոյանը՝ ճկասուսերակիրների մրցումներում:
Մեկնաբանելով մեր երկրի մարզիկների ելույթը ,Հայաստանի սուսերամարտի ֆեդերացիայի գլխավոր քարտուղար Արտաշես Մադոյանն «Արմենպրես»-ի թղթակցին ասաց, որ այս անգամ հայ մարզիկները, որոնք նախորդ մրցաշարում երկու հաղթող են ունեցել, ոչ այդքան հաջող մասնակցեցին:
Նա նշեց, որ մեր սուսերամարտիկները դեռ լավ մարզավիճակում չեն, բայց բոլոր դեպքերում ի վիճակի Էին ավելի բարձր արդյունքի հասնել:
Բաժանորդագրվեք մեր ալիքին Telegram-ում