Նորատուս գյուղում ցուլը մարդ է սպանել
ԳԱՎԱՌ, 29 ՕԳՈՍՏՈՍԻ, ԱՐՄԵՆՊՐԵՍ: Գեղարքունիքի մարզի Նորատուս գյուղի հանդում նույն գյուղի բնակիչ, 78 տարեկան Ժորա Գասպարյանը դարձել է ցուլի կատաղության զոհը:
Ինչպես «Արմենպրես»-ին տեղեկացրեց «Գավառի բժշկական կենտրոն» ՊՓԲԸ տնօրեն Աշոտ Կարապետյանը, Ժորա Գասպարյանը մահացել է Գավառի բժշկական կենտրոնում, տրավմատիկ շոկից: Դիահերձմամբ պարզվել է, որ ցուլն իր զոհին պատճառել է լուրջ մարմնական վնասվածքներ` կրծքավանդակի եւ աջ ու ձախ կողոսկրերի կոտրվածքներ, ներքին արյունահոսություն: Հանգուցյալի համագյուղացիների ներկայացմամբ` դեպքը տեղի է ունեցել Նորատուսի հանդում, որտեղ Ժորա Գասպարյանն անասուններ է արածեցրել: Համագյուղացիներից մեկի ցուլը նրան հարվածել է թիկունքից եւ անակնկալ` փախչելու կամ պաշտպանվելու հնարավորություն չտալով իր զոհին:
Խոսրով Խլղաթյան
Բաժանորդագրվեք մեր ալիքին Telegram-ում