ԵՐԵՎԱՆ, 13 ԱՊՐԻԼԻ, ԱՐՄԵՆՊՐԵՍ: Հայաստանի պետական երիտասարդական նվագախումբը ապրիլի 15-ին Կոմիտասի անվան կամերային երաժշտության տանը ելույթ կունենա երաժիշտ-կատարողների «Վերածնունդ» միջազգային մրցույթ-փառատոնի շրջանակում։ Ինչպես «Արմենպրես»-ին տեղեկացրին Հայաստանի պետական երիտասարդական նվագախմբի հասարակայնության հետ կապերի բաժնից, որպես մենակատար համերգի ընթացքում հանդես կգա կլարնետահար Իգոր Ֆյոդորովը Ռուսաստանից:

Երաժիշտ-կատարողների «Վերածնունդ» միջազգային 5-րդ մրցույթ-փառատոնը մեկնարկել է ապրիլի 10-ին Գյումրիում։ Այն կազմակերպել են ՀՀ մշակույթի նախարարությունը, Երեւանի Կոմիտասի անվան պետական կոնսերվատորիայի Գյումրու մասնաճյուղը, Մարդկային ռեսուրսների զարգացման «Փյունիկ» համահայկական հիմնադրամը։ Մրցույթ-փառատոնի նպատակը դասական արվեստի հանրահռչակումն է, տարբեր ազգերի երաժիշտ-կատարողների համար շփման հարթակի ձևավորումը եւ փորձի փոխանակման հնարավորությունը: Փառատոնի շրջանակում Երեւանում նախատեսված է դասական 5 համերգ: