ԵՐԵՎԱՆ, 5 ՓԵՏՐՎԱՐԻ, ԱՐՄԵՆՊՐԵՍ: Հայոց ցեղասպանության 100-րդ տարելիցը կարեւոր եւ էական հանգրվան է, իրադարձություն, որով չպետք է ավարտվի ճանաչման գործընթացին միտված ջանքերի ներդրումը: «Արմենպրես»-ի փոխանցմամբ` փետրվարի 5-ին, նախընտրական քարոզարշավի շրջանակներում պատասխանելով Երեւանի Մալաթիա-Սեբաստիա վարչական շրջանի ընտրողների հարցերին, այս մասին հայտարարեց ՀՀ նախագահի թեկնածու Սերժ Սարգսյանը:

«Հայոց ցեղասպանության 100-րդ տարելիցն ընդամենը մի հանգրվան է` էական եւ կարեւոր: Մենք պայքարելու ենք Ցեղասպանության ճանաչման համար այնքան, որքան անհրաժեշտ է»,- ասաց Սարգսյանը: «Ցեղասպանություն եւ եղեռն  բառերը նույնն են, եւ անգամ ցեղասպանություն բառը չարտասանելով էլ ԱՄՆ նախագահն ասել է ամեն ինչ»,- շեշտեց Սարգսյանը` անդրադառնալով ԱՄՆ նախագահ Բարաք Օբամայի կողմից այդ եզրի օգտագործմանը և ընդգծեց, որ շնորհակալ կլինենք բոլոր այն ժողովուրդներին, որոնք կճանաչեն Հայոց ցեղասպանությունը:   

Սարգսյանը անմտություն է համարում թուրքական լրատվամիջոցների կողմից Ցեղասպանության 100-րդ տարելիցի միջոցառումները ցունամիի հետ համեմատելը: Ցեղասպանության ճանաչումն, ըստ նրա, ոչ միայն բարոյական խնդիր է, այլեւ անվտանգության ապահովման, քանզի ցեղասպանությունը ժխտելով Թուրքիան վտանգում է մեր երկրի ազգային անվտանգությունը:

Նախագահի թեկնածուն տեղեկացրեց, որ ՀՀ Նախագահի գլխավորությամբ ստեղծվել է Հայոց ցեղասպանության 100-ամյա տարելիցի կազմակերպման միջոցառումների համակարգման հանձնաժողով: 

Պատասխանելով հայ-իրանական դիվանագիտական հարաբերություններին վերաբերող հարցին` Սերժ Սարգսյանը նշեց, որ  Հայաստանը շարունակելու է Իրանի Իսլամական Հանրապետության հետ սերտ համագործակցությունը:

Հայաստանում նախագահական ընտրությունները նշանակված են փետրվարի 18-ին: Հունվարի 21-ինմեկնարկած նախընտրական քարոզչությունը կավարտվի փետրվարի 16-ին:Փետրվարի 5-ին նախագահի թեկնածու սարգսյանը հանդիպելու է Մալաթիա-Սեբաստիա եւ Շենգավիթ համայնքների ընտրողների հետ: