ԳԱՎԱՌ, 21 ՓԵՏՐՎԱՐԻ, ԱՐՄԵՆՊՐԵՍ: Փետրվարին տեղացած առատ ձյունն ու  չընդհատվող ուժեղ ձնաբքերը գրեթե միշտ փակ վիճակում  են պահել Սելիմի լեռնանցքը` ռազմավարական  նշանակություն  ունեցող  ավտոճանապարհին    ստեղծելով բարդ ու անհաղթահարելի իրավիճակ:  Սակայն վերջին մի քանի   օրերին, եղանակային պայմանների հարաբերական կայունությանը զուգընթաց,  ճանապարհը սպասարկող կազմակերպության աշխատակիցները սկսեցին Սելիմի լեռնանցքի  բացման   ոչ այնքան դյուրին  աշխատանքները:

Ինչպես «Արմենպրես»-ի`Գեղարքունիքի թղթակցին աշխատանքների վայրում տեղեկացրեց ճանապարհի սպասարկումն իրականացնող «Շանթ-Սեյրան» ՍՊԸ աշխատակից Լյովա Հարեյանը, մշտապես փչող քամիները թույլ չեն տվել, որ ձնից մաքրվի Մարտունի-Գետափ ճանապարհի մոտ 20 կիլոմետրանոց հատվածը:  Սաստիկ ձնաբքերի հետեւանքով ճանապարհի առանձին հատվածներում կուտակված  ձյան շերտի բարձրությունը հասնում է  մինչև 2 մետրի: Մարտունի քաղաքից մինչև Սելիմի քարավանատուն` ձյան ծածկույթի տակ  գտնվող մոտ 18 կմ երկարությամբ ճանապարհի վրա աշխատում է  4 միավոր տեխնիկա:  Մեխանիզատորներն աշխատանքի հետ կապված որեւէ խնդիր, բացի  վերսկսվող ձնաբքերի վտանգից, չեն տեսնում:

Իսկ ընկերության ինժեներ Ռուբիկ Մնացականյանի հավաստմամբ` Սելիմի լեռնանցքում շուրջօրյա հերթապահություն է սահմանվում: Արդեն  հինգերորդ օրն է` չեն դադարում մաքրման աշխատանքները, որոնք կավարտվեն փետրվարի 21-ի երեկոյան, իսկ ճանապարհը հիմնականում երթեւեկելի կդառնա փետրվարի 22-ից:

  Իսկ թե որքան կպահպանվի այս վիճակը` կախված է միայն եղանակի քմահաճույքներից, քանզի  Սելիմում    երբեմն ձնաբքեր են լինում նույնիսկ ապրիլ ամսին: Նույն կազմակերպության ջանքերով վերջին օրերին ապահովվել է երթեւեկությունը Վերին Գետաշեն-Մադինա ճանապարհին: 

Դիտվել է 104 անգամ