2 წუთი კითხვის
სომხეთის პრემიერ-მინისტრმა ნიკოლ ფაშინიანმა დადებითად შეაფასა თურქეთის პრეზიდენტ რეჯეფ თაიფ ერდოღანთან გამართული შეხვედრა, რომელიც 11 ნოემბერს, თურქეთის ქალაქ ანთალიაში, COP31-ის კონფერენციის ფარგლებში შედგა.
„არმენპრესის“ ცნობით, ფაშინიანმა ამის შესახებ ტელეკომპანია TRT World-თან საუბარში განაცხადა, როდესაც უპასუხა შეკითხვას, თუ რა ეტაპზეა სომხეთსა და თურქეთს შორის ურთიერთობების ნორმალიზაციის პროცესი.
„დღეს ჩვენ ძალიან დადებითი შეხვედრა გვქონდა პრეზიდენტ ერდოღანთან, გვქონდა ძალიან პოზიტიური დიალოგი და უახლოეს მომავალში ჩვენი ურთიერთობების განვითარებას ველით“, - განაცხადა ფაშინიანმა.
შეკითხვაზე, ანიჭებს თუ არა მნიშვნელობას სომხეთისა და თურქეთის პარტნიორობას რეგიონული ურთიერთდაკავშირებადობის თვალსაზრისით, ფაშინიანმა დადებითად უპასუხა:
„დიახ, რა თქმა უნდა. ახლა ჩვენ ორ ქვეყანას შორის რკინიგზა უნდა აღვადგინოთ და გავხსნათ. ამ მიმართულებით ვმუშაობთ“.
ანთალიაში COP31-ის ფარგლებში, 11 ნოემბერს, სომხეთის რესპუბლიკის პრემიერ-მინისტრ ნიკოლ ფაშინიანსა და თურქეთის პრეზიდენტ რეჯეფ თაიფ ერდოღანს შორის შეხვედრა გაიმართა. სომხეთის პრემიერ-მინისტრის აპარატის მიერ გავრცელებული ინფორმაციით, თანამოსაუბრეებმა ყურადღება გაამახვილეს სომხეთ-თურქეთის ურთიერთობების ნორმალიზაციის პროცესზე და ხაზი გაუსვეს მის წინ წაწევასა და ლოგიკურ დასასრულამდე მიყვანის მნიშვნელობას. ამ მხრივ, მხარეებმა ხაზი გაუსვეს დღემდე განხორციელებულ ღონისძიებებსა და მიღწეულ შეთანხმებებს, ასევე სავაჭრო-ეკონომიკური ურთიერთობების შემდგომ წახალისებას. მოსაზრებები გაიცვალა ასევე რეგიონულ პროცესებზე. ნიკოლ ფაშინიანმა და რეჯეფ თაიფ ერდოღანმა ხაზგასმით აღნიშნეს სომხეთსა და აზერბაიჯანს შორის მშვიდობის დამყარების ფაქტი და აღნიშნეს, რომ მან ახალი იმპულსი შესძინა რეგიონული თანამშრომლობის განვითარებას. ყურადღება გამახვილდა საკომუნიკაციო გზების დებლოკირებაზეც, მათ შორის TRIPP-ის პროექტის განხორციელებისკენ მიმართულ ნაბიჯებზე.