2 წუთი კითხვის
სომხეთის უშიშროების საბჭოს მდივანი ალენ სიმონიანი არ მიიჩნევს, რომ თურქეთ-სომხეთის საზღვრის გახსნის პროცესი შეჩერებულია. „არმენპრესის“ ცნობით, ამის შესახებ სიმონიანმა ჟურნალისტებთან საუბარში განაცხადა.
„სომხეთის საზღვარი თურქეთთან ღიაა. პროცესი არ შეჩერებულა, შენელდა. ამას უფრო მეტად ვუკავშირებ სომხეთსა და აზერბაიჯანს შორის არსებული პროცესების დასრულებასა და უკუუქცევადობის წერტილის გადალახვას, რაც, ჩემი შეფასებით, ცალსახად უახლოესი მომავლის საკითხია. მხედველობაში მაქვს როგორც უკუუქცევადობის წერტილი, რომელიც მშვიდობის თვალსაზრისით ჩვენ უკვე დიდი ხანია გადავლახეთ, ისე საზღვრის გახსნის საკითხი. არ არსებობს არანაირი წინაპირობა იმისა, რომ იფიქრო, თითქოს ეს საკითხი არ გადაწყდება ან დამატებით გაჭიანურდება“, - განაცხადა ალენ სიმონიანმა.
უშიშროების საბჭოს მდივანმა დასძინა, რომ თურქეთის მხრიდანაც მიმდინარეობს სამუშაოები ამ მიმართულებით, რომლებიც ინფრასტრუქტურის აღდგენისკენაა მიმართული.
„ჩვენ ასევე გვაქვს შეხვედრები, ჩვენი ბიზნესმენები მიდიან იქ. ეს არის პროცესი, რომელსაც დადებითი დინამიკა აქვს“, - აღნიშნა სიმონიანმა.
22 სექტემბერს თურქეთის პრეზიდენტმა რეჯეფ თაიფ ერდოღანმა ნიუ-იორკში, გაეროს გენერალური ასამბლეის 81-ე სესიაზე გამოსვლისას აღნიშნა, რომ თურქეთმა და სომხეთმა პროგრესს მიაღწიეს ორმხრივი ურთიერთობების ნორმალიზების პროცესში.