მჰერ გრიგორიანმა და შეიხა ნასერ ალ-ნუეისმა ტურიზმის სფეროში სომხეთის დიდ პოტენციალსა და მისი რეალიზების შესაძლებლობებზე იმსჯელეს

სომხეთის რესპუბლიკის ვიცე-პრემიერმა მჰერ გრიგორიანმა გაეროს მსოფლიო ტურიზმის ორგანიზაციის გენერალური მდივანი შეიხა ნასერ ალ-ნუეისი მიიღო.

„არმენპრესის“ ცნობით, სომხეთის მთავრობიდან იუწყებიან, რომ შეხვედრაზე განხილულ იქნა ტურიზმის სფეროში სომხეთის დიდი პოტენციალი და მისი რეალიზების შესაძლებლობები.

ყურადღება გამახვილდა ტურიზმის სექტორის რეგულაციებსა და ციფრულ გადაწყვეტებზე, ასევე სომხეთში ამ მიმართულებით საუკეთესო გამოცდილების ლოკალიზაციის პერსპექტივაზე.

თანამოსაუბრეებმა აზრები გაცვალეს გაეროს მსოფლიო ტურიზმის ორგანიზაციასთან სომხეთის თანამშრომლობის შესაძლო მიმართულებებზეც.

ამ კონტექსტში ვიცე-პრემიერმა ხაზი გაუსვა ორგანიზაციის მიერ დაგროვილი გამოცდილებისა და ცოდნის მნიშვნელობას.