გარდაიცვალა ექსპერტი რიჩარდ გირაგოსიანი

სტამბოლში 61 წლის ასაკში პოლიტიკური და სამხედრო ანალიტიკოსი, ექსპერტი, რეგიონული კვლევების ცენტრის დირექტორი რიჩარდ გირაგოსიანი გარდაიცვალა.

„არმენპრესის“ ცნობით, ამის შესახებ X-ის საკუთარ გვერდზე კრიზისების საერთაშორისო ჯგუფის თურქეთისა და კვიპროსის საკითხთა ოფისის დირექტორმა, ნიგიარ გიოქსელმა დაწერა.

„მისი არყოფნა უზარმაზარ სიცარიელეს დატოვებს იმ პატარა სამყაროში, რომელსაც ორ ათწლეულზე მეტია ვინაწილებდით“, - წერს გიოქსელი.

რიჩარდ გირაგოსიანი სტამბოლში 18 სექტემბერს ჰოსპიტალიზებული იქნა.

გირაგოსიანი სტამბოლში საქმიან შეხვედრაში მონაწილეობის მისაღებად გაემგზავრა, თუმცა გასული კვირის განმავლობაში მისი ჯანმრთელობის მდგომარეობა გაუარესდა. მას ტვინში სისხლჩაქცევა დაუდგინდა.

ბოლო ორი დღის განმავლობაში რიჩარდ გირაგოსიანი ოქმეიდანის პროფესორ დოქტორ ჯემილ თაშჩიოღლუს სახელობის საავადმყოფოს რეანიმაციულ განყოფილებაში იმყოფებოდა.

რიჩარდ გირაგოსიანი 1965 წლის 8 იანვარს აშშ-ის ქალაქ პროვიდენსში დაიბადა. იგი მუშაობდა აშშ-ის კონგრესში, რადიო „თავისუფლების“ ევროპულ შტაბ-ბინაში, Jane's Information Group-სა და სხვა სტრუქტურებში.

2000-იანი წლების დასაწყისში იგი საცხოვრებლად სომხეთში გადავიდა. 2009 წლის თებერვლიდან 2011 წლის მარტამდე ეკავა სტრატეგიული და ეროვნული კვლევების სომხური ცენტრის დირექტორის პოსტი. 2011 წლის აპრილიდან კი ხელმძღვანელობდა მის მიერვე დაარსებულ რეგიონული კვლევების ცენტრს.