3 წუთი კითხვის
სომხეთს გიუმრიში განთავსებული 102-ე რუსული სამხედრო ბაზის ქვეყნიდან გაყვანის საკითხი არასდროს დაუყენებია. „არმენპრესის“ ცნობით, ამის შესახებ სომხეთის რესპუბლიკის პრემიერ-მინისტრმა ნიკოლ ფაშინიანმა ეროვნულ ასამბლეაში კითხვა-პასუხის საათზე განაცხადა.
„2018 წლიდან ვურთიერთობ რუსეთის ფედერაციის პრეზიდენტთან და სხვა მაღალი რანგის ოფიციალურ პირებთან და არასდროს, არცერთხელ სომხეთიდან 102-ე რუსული სამხედრო ბაზის გაყვანის საკითხი არ გამიჟღერებია. საერთოდ, სომხეთის არცერთ წარმომადგენელს არასდროს დაუყენებია ასეთი საკითხი“, - განაცხადა ფაშინიანმა.
პრემიერ-მინისტრმა შეახსენა რუსეთის პრეზიდენტის, ვლადიმერ პუტინის მიერ ბიშკეკში გაკეთებული განცხადება, რომლის თანახმადაც, თუ სომხეთი რუსული სამხედრო ბაზის ყოფნის საჭიროებას ვერ ხედავს, რუსეთი მზად არის იგი გაიყვანოს.
„როდესაც ბიშკეკიდან ერევანში ვბრუნდები, მეორე დღეს ვხედავ, რომ რუსეთის პრეზიდენტმა განაცხადა: თუ სომხეთს სურს, რომ სამხედრო ბაზა გავალაგოთ, ჩვენ გავალაგებთ“, - აღნიშნა ფაშინიანმა.
მისი თქმით, ამის შემდეგ ჟურნალისტებთან ბრიფინგზე მან უპასუხა პუტინის განცხადებას და ხელახლა დაადასტურა, რომ სომხურ მხარეს სამხედრო ბაზის გაყვანის საკითხი არ დაუყენებია.
„სომხეთს 102-ე სამხედრო ბაზის გაყვანის საკითხი არასდროს დაუყენებია, მაგრამ თუ რუსეთის ფედერაცია გადაწყვეტს, რომ სამხედრო ბაზა გაჰყავს, სომხეთი წინააღმდეგი არ იქნება, რადგან სამხედრო ბაზის ყოფნას სომხეთის რესპუბლიკაში არ აქვს სასიცოცხლო მნიშვნელობა სომხეთის რესპუბლიკისთვის. ხოლო თუ რუსეთის ფედერაციას სურს სამხედრო ბაზის შენარჩუნება, ჩვენ მზად ვართ ეს განვიხილოთ. ეს არის მთელი ისტორია და განცხადება, არაფერი მეტი და არაფერი ნაკლები“, - განაცხადა ფაშინიანმა.
2 სექტემბერს რუსეთის პრეზიდენტმა ვლადიმერ პუტინმა ბიშკეკში ჟურნალისტებთან შეხვედრაზე განაცხადა, რომ თუ სომხეთი მიიჩნევს, რომ მას რუსული სამხედრო ბაზა არ სჭირდება, რუსეთი მზად არის იგი გაიყვანოს „ხვალვე“. ამავდროულად მან აღნიშნა, რომ თუ სომხურ მხარეს სურს რუსული სამხედრო ყოფნის შენარჩუნება, მოსკოვი მზად არის გააგრძელოს თანამშრომლობა.
3 სექტემბერს ნიკოლ ფაშინიანმა ჟურნალისტებთან ბრიფინგზე უპასუხა აღნიშნულ განცხადებას და ხაზი გაუსვა, რომ ერევანს 102-ე სამხედრო ბაზის გაყვანის საკითხი არ დაუყენებია.