2 წუთი კითხვის
ერევანში, არამ ხაჩატურიანის სახელობის საკონცერტო დარბაზში, 21 ნოემბერს ენდრიუ დონალდსი - ENIGMA-ს „ოქროს ხმა“ წარსდგება.
„არმენპრესის“ ცნობით, არტისტი, სიმებიანი ორკესტრისა და საბავშვო გუნდის თანხლებით, ENIGMA-ს ჰიტებსა და საკუთარ სოლო კომპოზიციებს წარადგენს.
გერმანელი მუსიკოსისა და პროდიუსერის, მიხაელ კრეტუს მიერ შექმნილმა პროექტმა გააერთიანა ელექტრონული მუსიკა, ეთნიკური მოტივები, საგუნდო პარტიები და ატმოსფერული ჟღერადობა, რითაც საკუთარი, ცნობადი მუსიკალური ენა ჩამოაყალიბა. პროექტის ჟღერადობაში განსაკუთრებული ადგილი ენდრიუ დონალდსის ხმას უკავია.
იამაიკელმა მომღერალმა სოლო კარიერა 1990-იან წლებში დაიწყო, 1998 წელს კი ENIGMA-ს შეუერთდა და მიხაელ კრეტუსთან თანამშრომლობა წამოიწყო. მისი ვოკალი პროექტის საკვანძო ალბომებში გაჟღერდა და მათი მუსიკალური ატმოსფეროს განუყოფელ ნაწილად იქცა.
აქტიურ წლებში ENIGMA-მ მსოფლიო მასშტაბით 70 მილიონზე მეტი ალბომი გაყიდა და მრავალი „პლატინისა“ და „ოქროს“ ჯილდო მოიპოვა. მათმა სიმღერებმა - Sadeness (Part I), Return to Innocence, Beyond the Invisible და Modern Crusaders - მსოფლიო მუსიკის ისტორიაში საპატიო ადგილი დაიკავეს.
პარალელურად, დონალდსმა მუსიკალური გზა სოლო შემსრულებლის რანგშიც გააგრძელა. მას საერთაშორისო აღიარება მოუტანა ისეთმა ცნობილმა სიმღერებმა, როგორებიცაა Mishale, All Out of Love, Save Me Now და სხვა. მისი მუსიკა ჟღერდა ფილმებსა და ტელეპროექტებში.
ერევანში მოსალოდნელი კონცერტი ENIGMA-ს საყვარელი კომპოზიციების ცოცხლად, ახალ ფორმატში მოსმენის შესაძლებლობას გახდის. ნაცნობ ელექტრონულ ჟღერადობას ცოცხალი სიმებიანი ორკესტრი და საბავშვო გუნდი შეერთდება, რაც შთამბეჭდავ და ემოციურ სასცენო პროგრამას შექმნის.