ერევნის მერმა სომხეთში გაერთიანებული სამეფოს ელჩი მიიღო

ერევნის მერმა ტიგრან ავინიანმა სომხეთის რესპუბლიკაში დიდი ბრიტანეთისა და ჩრდილოეთ ირლანდიის გაერთიანებული სამეფოს საგანგებო და სრულუფლებიანი ელჩი ალექსანდრა ქოული მიიღო.

„არმენპრესის“ ცნობით, ამის შესახებ ინფორმაციას ერევნის მერია ავრცელებს.

შეხვედრის ფარგლებში მხარეები შეეხნენ ადგილობრივი თვითმმართველობის დონეზე ერევანსა და ბრიტანეთის ქალაქებს შორის ორმხრივი ინტერესის მქონე თანამშრომლობის შესაძლებლობებს.

ელჩისთვის ქალაქის განვითარებისკენ მიმართული მნიშვნელოვანი პროგრამებისა და საინვესტიციო თვალსაზრისით საინტერესო მსხვილი ურბანული პროექტების წარდგენისას, მერმა ავინიანმა აღნიშნა, რომ ერევანი ღიაა ინოვაციური იდეებისთვის, მოწინავე ტექნოლოგიებისა და მდგრადი ინვესტიციებისთვის.

თბილი მიღებისთვის მადლობის გადახდისას, ელჩმა ალექსანდრა ქოულმა, თავის მხრივ, აღნიშნა, რომ თავისი უფლებამოსილების ფარგლებში ხელს შეუწყობს ერევნის საინვესტიციო შესაძლებლობების წარდგენასა და ბრიტანელი ინვესტორების მოზიდვას.

„ერევანი მიმზიდველი და საინტერესო ბაზარია ორმხრივი ეკონომიკური თანამშრომლობის გაღრმავებისთვის“, - აღნიშნა ელჩმა.

ასევე ხაზი გაესვა გამოცდილების გაზიარების მნიშვნელობას ინფრასტრუქტურის განვითარების, ურბანული დაგეგმარების, საზოგადოებრივი სივრცეების კეთილმოწყობისა და ციფრული ტრანსფორმაციის სფეროებში.