ევროკავშირთან სომხეთის დაახლოებამ რუსეთში გარკვეული შეშფოთება გამოიწვია, თუმცა მისი ღრმა მიზეზი სხვა რამ არის - ფაშინიანი

სომხეთის რესპუბლიკის პრემიერ-მინისტრის, ნიკოლ ფაშინიანის განცხადებით, ევროკავშირთან სომხეთის პარტნიორობის სტრატეგიული დღის წესრიგი თვალსაჩინო ტემპით ხორციელდება.

„არმენპრესის“ ცნობით, ეროვნულ ასამბლეაში მთავრობის პროგრამის წარდგენისას პრემიერ-მინისტრმა შეახსენა, რომ გასულ წელს მიღებულმა კანონმა სომხეთის რესპუბლიკის ევროკავშირში გაწევრიანების პროცესის დაწყების შესახებ ამ პროცესს ახალი იმპულსი მისცა.

„სომხეთი დღეს ერთადერთი ქვეყანაა, რომელთანაც ევროკავშირი ვიზების ლიბერალიზაციაზე აქტიურ მოლაპარაკებებს აწარმოებს, და ჩვენ განზრახული გვაქვს ევროკავშირთან ვიზების ლიბერალიზაციას მივაღწიოთ 2029 წლის განმავლობაში“, - განაცხადა მან.

ფაშინიანის თქმით, ევროკავშირთან ურთიერთობების დაახლოებამ გარკვეული შეშფოთება გამოიწვია რუსეთის ფედერაციაში.

„ჩემი აზრით, ევროკავშირთან ჩვენი ურთიერთობების განვითარებამ რეალურად ამის საბაბი მისცა და არა ღრმა მიზეზი. ხოლო რუსეთში წარმოქმნილი შეშფოთების ფუნდამენტური მიზეზი ის ტრანსფორმაციაა, რომელიც დაიწყო სომხეთ-რუსეთის ურთიერთობებში. ამასთან, ეს ტრანსფორმაცია ვინმეს ურჩობა კი არ არის, არამედ დიდი ანგარიშით ბუნებრივი პროცესია“, - აღნიშნა პრემიერ-მინისტრმა და დასძინა, რომ ერთი რამ არის სომხეთ-რუსეთის ურთიერთობა კონფლიქტის პირობებში და სულ სხვა რამ იმ პირობებში, როდესაც სომხეთსა და აზერბაიჯანს შორის მშვიდობაა დამყარებული, ხოლო სომხეთ-თურქეთის ურთიერთობებში დაძაბულობა საერთოდ არ არის და პერსპექტივა პოზიტიურია.

„ობიექტური და სუბიექტური ისტორიული გარემოებების გამო რუსეთთან ჩვენი ურთიერთობების აღქმა ძირითადად სამხედრო-უსაფრთხოებითი იყო. უკვე ორი საუკუნეა სომხეთ-რუსეთის ურთიერთობები აგებული იყო იმ საყრდენსა და გაგებაზე, რომ რუსეთი სომხი ხალხის, შემდეგ კი სომხეთის რესპუბლიკის უსაფრთხოების გარანტია. ეჭვი არ მეპარება ამ ფუნქციის შესრულებაში რუსეთის ერთგულებაში, მაგრამ 2021, 2022, 2023 წლების მოვლენებმა აჩვენა, რომ უსაფრთხოების საკუთარი პრობლემების ქონის გამო რუსეთის ფედერაციას ხანდახან შეიძლება ჰქონდეს არსებითი შეზღუდვები ამ როლის შესასრულებლად“, - დასძინა ფაშინიანმა.