ნიკოლ ფაშინიანმა სამველ კარაპეტიანის „საიდუმლო გეგმა“ გაამჟღავნა

სომხეთის პრემიერ-მინისტრმა ნიკოლ ფაშინიანმა განაცხადა, რომ რუსეთის მიერ სომხეთის მიმართ გამოყენებული იმპორტის შეზღუდვები წახალისებული და თხოვნილია სომხეთის ზოგიერთი ოპოზიციური წრის მიერ.

ნიკოლ ფაშინიანმა ეს დააკავშირა სომხეთში ხელისუფლების შეცვლის „საიდუმლო გეგმასთან“, რომლის შესახებაც უფრო ადრე ბლოკ „ძლიერი სომხეთის“ ლიდერმა სამველ კარაპეტიანმა ისაუბრა.

შეგახსენებთ, რომ სომხეთში გამართული საპარლამენტო არჩევნების შემდეგ ჟურნალისტებთან გამართულ ერთ-ერთ ბრიფინგზე ბლოკ „ძლიერი სომხეთის“ ლიდერმა სამველ კარაპეტიანმა განაცხადა, რომ მათ ხელისუფლების შეცვლის „საიდუმლო გეგმა“ აქვთ და ამ გეგმით იმოქმედებენ.

„არმენპრესის“ ცნობით, ეროვნულ ასამბლეაში მთავრობის პროგრამის წარდგენისას ნიკოლ ფაშინიანმა რუსეთთან სომხეთის ურთიერთობებზე ისაუბრა და ხაზი გაუსვა, რომ სომხეთის რესპუბლიკის მთავრობის მიზანია რუსეთის ფედერაციასთან ორმხრივად სასარგებლო, მრავალსექტორულ თანამშრომლობაზე მიმართული დიალოგი, დაბალანსებული და საპირწონე საგარეო პოლიტიკის, რეგიონში მშვიდობის დამყარების ახალ პირობებში ურთიერთობების გარდაქმნის, განვითარებისა და გაღრმავების მიმართულებით.

„ეს არ არის იოლი პროცესი, მაგრამ ჩვენ ვნებების აღელვების გარეშე წავალთ ამ გზით. მაგრამ პირდაპირ უნდა ითქვას: იმპორტის ის შეზღუდვები, რომლებსაც რუსეთი სომხეთის მიმართ იყენებს, წახალისებული და თხოვნილია ოპოზიციის მიერ, რომელმაც რუსეთის გარკვეული წრეების წინაშე სომხეთში ხელისუფლების შეცვლის დავალება აიღო და ამ წრეებს დაარწმუნა, რომ შეზღუდვების გამოყენება უზრუნველყოფდა მათ გამარჯვებას არჩევნებში. სომხური ეს იგივე წრეები ახლაც არწმუნებენ რუსულ ამავე წრეებს, რომ თუ შეზღუდვები გაგრძელდება და უფრო გამკაცრდება, ისინი ქუჩის ბრძოლით შეცვლიან ხელისუფლებას. „საიდუმლო გეგმა“, რომელზეც ომის სამთავიანი პარტიის ერთ-ერთი ლიდერი საუბრობდა, სწორედ ეს არის. ამ გეგმის თანახმად, მათი მფარველების მხარდაჭერით ისეთი ეკონომიკური შეზღუდვები უნდა დაწესდეს, რომ სომხეთში სოციალურ-ეკონომიკური კრიზისი დაიწყოს, რათა ხალხმა მთავრობის წინააღმდეგ სოციალური ბუნტი მოაწყოს: ეს არის „საიდუმლო გეგმის“ არსი“, - განმარტა ფაშინიანმა.

მისი თქმით, ეს არ არის მსგავსი პირველი გეგმა, ასეთი რამდენიმე გეგმა წარსულში უკვე ჩაიშალა. პრემიერ-მინისტრი დარწმუნებულია, რომ ეს გეგმაც ჩაიშლება:

„რადგან სომხეთის ხალხი თავის სახელმწიფოებრიობას, დამოუკიდებლობას, სუვერენიტეტს მაფიას არ დაუთმობს, ხოლო სომხეთის ეკონომიკა განაგრძობს თავის დინამიკურ განვითარებას“, - აღნიშნა ნიკოლ ფაშინიანმა.